RUS
Бұл ретте, ҚР Қаржы министрлігі Мемлекеттік кірістер комитеті тұрғындарға түсіндіру жұмыстарын жүйелі жүргізуге барынша тырысып жатыр.
Комитеттің Жеке тұлғалардың кірістерін әкімшілендіру басқармасының басшысы Дина Құсайынова арнайы ұйымдастырылған баспасөз конференциясында бұл бағытта атқарылып жатқан жұмыстарға тоқталды.
«2021 жылдың 1 қаңтарынан бастап Қазақстанда кезең-кезеңімен жалпыға бірдей декларациялау енгізілгені белгілі. Бірінші кезеңде 580 мыңға жуық мемлекеттік қызметкерлер және оларға теңестірілген адамдар, олардың жұбайлары тиісті құжаттарды өткізді. Екінші кезеңде, яғни, 2023 жылдың 1 қаңтарынан бастап декларацияны мемлекеттік мекемелер мен квазимемлекеттік сектордың шамамен 2,1 млн қызметкері, олардың жұбайлары тапсырды. Үшінші кезеңде, 2024 жылдың 1 қаңтарынан бастап декларацияны шамамен 2,4 млн жеке тұлғалар тапсыруға тиіс. Олар – заңды тұлғалардың басшылары мен құрылтайшылары (қатысушылары), жеке кәсіпкерлер, сондай-ақ олардың жұбайлары. Әзірге 35 пайызға жуық адам тапсырып үлгерді. Шекті мерзім жақындаған сайын азаматтардың белсенділігі артып жатқанын атап өткен жөн», - деді ол.
Төртінші кезеңде, 2025 жылдың 1 қаңтарынан бастап еліміздің барлық азаматы декларация тапсыруға міндетті. Олардың қатарында зейнеткерлер мен үй шаруасындағы әйелдер де бар. Жалпыға бірдей декларациялау жүйесіне шамамен 13 млн адам енеді деп күтіліп отыр.
Айтпақшы, ҚР «Әкімшілік құқық бұзушылық туралы» кодексіне сәйкес, декларацияны ұсынбағаны үшін әу баста ескерту жасалса, бір жыл ішінде қайталап бұзғаны үшін – 55 380 теңге (15 АЕК) мөлшерінде айыппұл салынбақ.