RUS
SMARTNEWS.KZ басылымының хабарлауынша, Ұлттық банк төрағасы Тимур Сүлейменов KASE-нің ресейлік акционері санкцияға тап болғаны үшін елімізде бірыңғай биржалық холдинг құру ісі тұралап қалғанын айтты. Бұл туралы Kazinform жазды.
«KASE мен „Астана“ халықаралық қаржы орталығындағы AIX биржасының әлеуеттерін біріктіру туралы айтсақ, себебін жақсы білесіздер. Акционерлердің бірі MOEX (Мәскеу биржасы) санкцияға ілінді. Сәйкесінше, бірыңғай биржалық холдинг құру іс жүзінде жүзеге аспайтын болып тұр. Сондықтан қазіргі ахуал тұрғанда „тоқта“ деген мәселеге келіп тұрмыз. Төте сұраққа төте жауап осындай. Әзірге бұл істі аяқтай алмаймыз, тіпті ойлай да алмаймыз. Өйткені KASE-нің құрамында санкцияға түскен акционер бар», — деді ол кезекті баспасөз мәслихатында.
Сондай-ақ, ол Мәскеу биржасымен арадағы мәселені KASE-нің өзі шешу керектігін айтты.
«Қазір Мәскеу биржасына тиесілі акцияларды KASE-нің өзіне қайта сатып алу туралы әңгімелер жүріп жатыр. Әрине, олар аталған үлесті өздеріне қайта сатып алғысы келеді. Өйткені санкцияның әсері өздеріне тимегенін қалайды. Біз — KASE-нің ең ірі акционерлерінің біріміз. Бірақ бізден басқа акционерлері де жетерлік. Сондықтан нақты шешімнің нақты тетіктерін KASE-нің өзіне сұрау керек», — деді Тимур Сүлейменов.