RUS
SMARTNEWS.KZ басылымының хабарлауынша, "Рахат" базарының жүзден астам саудагері Жетісу ауданының әкімдігін үшінші жыл сотқа беріп отыр. Өйткені, билік барахолка аумағында саябақ құруды жоспарлап, кәсіпкерлерді саудадан бас тартуға мәжбүрлеген.
"Барахолканың ортасында ешқандай қоғамдық бақ болуы мүмкін емес. Жергілікті билік пен шенеуніктер бюджет қаражатын пайдаланып, бұл аумақты басып алу шараларын қалай жүзеге асырып жатыр? Мұның әдейі жасалғанын түсінеміз", – дейді "РАХАТ" базары мен "Еуразия" сауда үйі кәсіпкерлерінің өкілі Жәнібек Башанов.
"Еуразия" сауда орталығының басқа да бизнесмендері түйткілді мәселелерді айтып өтті. Онда бұрынғы қожайын базарды қалпына келтіреміз деген сылтаумен 67 адамнан 5 миллионға жуық доллар жинап, оларды жалдаушы емес, бутик иесі етуге уәде берген. Содан базарды сатып, Ресейге қашып кеткен.
“Прокурорларға талай рет бардық – нәтиже болмады. Әр жолы тәртіп сақшылар сылтау айтады. Қылмыстық іс 2023 жылдың басында қозғалған. Одан бері ештеңе алға жылжыған жоқ. Базардың жаңа қожайыны жалдау ақысын 30 пайызға өсірді. Ал біз бұрынғыға бар ақшамызды бердік, сондықтан банкрот болудың аз-ақ алдында тұрмыз”, – деді кәсіпкер Сәуле Абдуллина.
Қазір бұл іс бойынша сот процесі жүріп жатыр екен.
“Кез келген мәселенің ортақ шешімі жоқ. Кәсіпкерлер барлық жерде ұтылып жатыр. Мәселен, билік "Рахат" базарының аумағынан тыс жерде саябақ салуы мүмкін еді. Ал ақшаны алдап алып кеткен "Еуразия" базарының бұрынғы қожайыны Ресейден экстрадицияланып, қаражатты қайтаруға мәжбүр болуы керек”, – деді заң палатасының мүшесі Жәмилә Төленова.
Алматы қаласы жер комиссиясының 2023 жылы 16 ақпандағы шешімімен Жетісу ауданы, Солтүстік айналма көшесі 9 бойында орналасқан ауданы 97 гектар жер телімі Жетісу аудандық аппаратына абаттандыруға берілген.
Алматы қаласын дамытудың бас жоспарына сәйкес, алдағы жылдары әйгілі Алматы барахолкасындағы базарлар қала сыртына көшірілуі мүмкін.