RUS
Осыдан бес-алты ай бұрын Америкада бір тәжік пен екі орыс ұсталған еді. Оларға АҚШ-тан Ресейге тауар жеткізумен айналысады деген күдікке іліккен. Тауар болғанда да зымырандар мен снарядтарды жасауға аса қажетті микросхемалар мен тағы басқа бөлшектерді Америкадан алып, өзге елдер арқылы Ресейге жеткізілетін жүйе жасаған екен. Ондаған миллион доллардың тауарын аттандырып үлгерген. Бүкіл операцияны тәжік басқарып келіпті. Сол тәжік бірер күн бұрын өзінің АҚШ-та жүріп, жылдар бойы Ресейдің пайдасына қандай жұмыстарды жүзеге асырып келгенін мойындапты. Енді ол 20 жылға дейінгі мерзімге бас бостандығынан айырылуы мүмкін. Онымен бірге ұсталғандар да кінәларын мойындапты.
Ұсталған тәжік - 53 жастағы кәсіпкер, көп жылдан бері Америкада тұрып келген Салимжон Насриддинов деген Тәжікстан және Ресей азаматы екен. Онымен бірге ұсталғандар – АҚШ-та тұрып келген 38 жастағы Ресей және Канада азаматы Николай Гольцев есімді орыс пен оның 32 жастағы Кристина Пузырева есімді жұбайы.
Олар санкцияны айналып өтіп, Ресей армиясының қажеттілігі үшін қолдануы мүмкін америкалық электрониканы тасымалдаған деп айыпталды. Бұл жөнінде АҚШ-тың әділет министрлігі мәлімдеді.
Насриддинов пен Гольцев ресейлік «Тесткомплект», «Радиавтоматика», «ЭКВ-Нева» және «Комтек» деген компаниялар үшін америкалық компаниялардан құрал-жабдықтарды сатып алып, жөнелтіп отырғандарын мойындаған. Олар сатып алған электрондық тетіктер кейін Украинада тәркіленген ресейлік қарулардан табылған.
Салимжон Насриддинов америкалық компаниялардан жабдықтарды және электрониканы сатып алу үшін 2021 жылы сол жақта SH Brothers Group деген атпен компания тіркеген. Ал 2023 тағы бір SN Electronics деген компания құрып, оны өзінің әйелінің атына тіркепті. Осындай компаниялар арқылы тауарларды Гонконг, Түркия, Үндістан, Қытай және Біріккен Араб Әмірліктерінде орналасқан компаниялар арқылы Ресейге жөнелтіп отырған.
Салимжон Насриддинов АҚШ-тың Бруклин қаласынан «Тандури» деген мейрамхана да ашыпты. Бұрын ол көп жылдар бойы Ресейде жұмыс істеп, Тәжікстандағы Рогун ГЭС-нің құрылысы үшін техникалар жеткізіп отыруға көмектескені жайлы жазылған. Сол тұста Тәжікстан билігі оны марапаттаған екен.
Насриддинов компаниялардан тауарды алып, жөнелтіп отыруды ұйымдастырған, соған жетекшілік еткен. Тауардың қорабын өзгертіп, жасырып аттандыратын болыпты. Ал Гольцевтер Ресей компанияларынан тапсырысты қабылдап отырған. Әрине, олар Ресей компанияларынан ақша алып, осындай күрделі жұмысты жолға қойған. Алдымен олардың соңдарына прокуратура түскен. Соңынан тәжік жатқан үйінен, ал орыстар мейманханадан ұсталған.
Оларды біраз уақыт аңдыған екен. Сонда құқық қорғау органының адамдары телефонмен сөйлескен сөздерін тыңдап, жазған хабарламаларын оқыған. Мысалы, 23-ақпанда Насриддинов Гольцевке: «Отан қорғау күнімен құттықтаймын!» деп жазыпты. Гольцев Нариддинолвке жауабында: «Өзіңді де құттықтаймын! Біз де шамамыз келгенше отанымызды қорғап жатырмыз» деп жауап қатқан. Электроника мен микросхемаларды алып, Ресейге жөнелту жұмысын Насриддинов 49 рет ұйымдастырғаны белгілі болыпты. Осының бәрінде ол ерлі-зайыпты Гольцевтермен жұмыс жүргізген. Бір қызығы, Насриддинов ғылыммен де айналысқан көрінеді. Экономика ғылымдарының докторы екен. Докторлық диссертацияны Ресейде қорғаған. Америкада ол тәжік мигранттарымен тығыз қарым-қатынас орнатыпты. Америкадағы тәжік мигранттарға қолдау көрсететін ұйым құруға атсалысқан.
Қалай болғанда да тәжік кәсіпкері енді ұзақ жылға бас бостандығынан айырылатыны анық. Оның ұсталып, енді сотталатыны Ресейдің шет елдерде жүрген агенттері үшін сабақ болса керек.