RUS
Тегіс жерде сүрінетіндер жүзден біреу болса да араларынан бой көрсетіп тұратыны өкінішті. Еліміздің аумағанда имамдардың шалыс қадамға бару жағдайлары талай рет болды, олар заң бойынша жауапқа тартылды. Имамдардың ішінде арақ ішкен, алаяқтық жасаған, әйел зорлағандары әшкере болған кездер бар. Әрине, имамдардың ішінде жұртты ұйыстырып, жамағатты діннің тұнығынан сусындатып, тұрғындардың құрметіне бөленіп жүрген біліктілерікөп. Ал аракідік дін қызметінің атына кір келтіретін әлгіндей есерсоқ имамдар да кезігіп жатса, бұған адам баласының пендешілігі деп қарамасқа лаж жоқ.
Міне, имамның шалыс басуының жаңа оқиғасына тағы да тап болдық. Білдей облыстың білдей бас имамы арақ ішіп, түнгі клуб жағалап, мас халде көлік жүргізді деп жатыр.
Қостанай облысының бас имамы Бахытбек Нұрғабылұлы Тәжімбет Бурабайдағы түнгі клубтардың бірінен шығып, масаң күйде көлік айдап бара жатқан жерінде ұсталды деген тосын хабар тарады. Бұған жұрт жағасын ұстап, таң қалды.
Имамның түнгі жүріс-тұрысы бүге-шігесіне дейін расталды. Ол заңмен жазаланды және жұмысынан босатылды. Сот қаулысымен 15 тәулікке қамалып, 7 жылға көлік құралын басқару құқығынан айырылды.
Сот қаулысында: «Тәжімбет Бахытбек Нұрғабылұлы Әкімшілік құқық бұзушылық туралы кодекстің 608-бабының 1-бөлігімен кінәлі деп танылсын, оған осы бап бойынша 15 тәулікке қамаққа алу және 7 жылға көлік құралын басқару құқығынан айыру жазасы тағайындалсын. Қамаққа алу уақыты 2024 жылғы 23-шілдеде сағат 16:53 минуттан бастап есептелсін», – деп жазылған. Мұндағы Әкімшілік құқық бұзушылық туралы кодекстің 608-бабының 1-бөлігі көлік құралын алкогольдік ішімдік ішіп басқару қылмысын қарастырады.
Анықталғанындай, оқиға 23-шілде күні түнгі сағат үште болған. «777 DPA 10» нөмірлі Toyota Highlander мінген бас имам Бурабай кентіндегі түнгі клубтың жанынан мас күйінде ұсталған. Сот отырысында ол ішімдік ұрттағанын мойындамаған, қымыз ғана іштім деп ақталған. Алайда медициналық куәландыру мешіт қызметкерінің алкоголь ішкенін растаған. Сот қаулысында әкімшілік жаза қолдану кезінде оның жауаптылығын жеңілдететін мән-жайлардың жоқ екендігі, ал жауаптылығын ауырлататын мән-жай ретінде оның алкогольдік масаң күйде болуы ескерілгені айтылған.
Бұл оқиғаға байланысты Қазақстан мұсылмандары діни басқармасы ресми пікір білдірді. Онда былай делінген: «Діни басқарманың қызмет жүйесінде заң нормаларын және дін қызметкері этикасын өрескел бұзатын жеке тұлғалардың діни салада жұмыс істеуіне моральдық тұрғыдан құқығы жоқ. Қазақстан мұсылмандары діни басқармасы дін қызметкеріне лайықсыз әрекет жасаған Бахытбек Тәжімбетті Қостанай облысының бас имамы қызметінен босатты. Қазақстан мұсылмандары діни басқармасы болған оқиғаны үлкен өкінішпен қабылдап, еліміздегі мұсылман жамағатынан кешірім сұрайды».
Сотталған дін қызметкері Бахытбек Тәжімбет 2015-жылдың қараша айынан Қостанай облысы бойынша өкіл имам және Қостанай облыстық «Марал ишан» мешітінің бас имамы болып қызмет атқарып келген екен. Өзі отбасылы, екі баланың әкесі дейді. Өмірбаянына қарасаңыз, 1983 жылы Қызылорда облысының Жаңақорған ауданында туған. Үш медресені тәмамдапты. Олар - Түркістандағы «Хасан Оралтай», Шымкенттегі «Қамар», Алматыдағы «Таугүл» медреселдері. Содан кейін Стамбул қаласындағы «Стамбул муфтиятында» білім алған екен. Қызметін Шымкенттегі «Қамар» медресесінде ұстаздықтан бастаған. Одан кейін бірнеше облыста медресе ұстазы болған. Келе-келе Ақтөбе облыстық орталық «Нұр Ғасыр» мешітінің найб имамдығына тағайындалған. Қостанайға ауысардан бұрын Ақтөбе қалалық орталық мешітінде бас имам қызметін атқарыпты.
Міне, осындай бір өте келеңсіз оқиға орын алды. Имамның түнгі клуб жағалауының өзі адамды бірталай ойға жетелейді екен. Қостанай қайда, Бурабай қайда. Арасы кемі бес жүз шақырым жер. Осынша қашықтағы түнгі клубқа қыдыруы, қымбат көлік мінуі, оған қоса спирттік ішімдік ішіп жүруі имамның сөзі мен ісінің алшақтығын көрсетсе керек. Молданың айтқанын істе, ал істегенін істеме деген мәтел осындайдын қалған болар. Өзін он бес тәулікке қамамақ түгілі ұрса да обал жоқ адам екен.
Ұрса дегеннен шығады, биыл сәуірде Петропавлда мешіттің имамын біреу ұрып-соғып кеткен еді. Имамды ұрған адам сотталды. 15-сәуірде тапа-тал түсте Петропавл қаласындағы облыстық Қызылжар мешітінде біреу бүкіл жамағаттың көзінше жанжал шығарған. Ол жұрттың бәріне дөрекілік жасап, ақыры имамды бет-жүзінен жұдырықпен екі рет ұрған. Әлгі адамды ұсақ бұзақылық жасады деп он бес тәулікке қамаған.
Ал енді имамдардың тарапынан істеліп жататын өрескел қылықтарға қайта оралсақ, тағы бірталай оқиғаларға тап боламыз. 2021 жылы Қарағандыда имамның кәмелетке толмаған қызды зорлағаны әшкере болған еді. Сол кезде Қарағанды облысының мамандандырылған ауданаралық соты бірнеше ай бойы 13 жасар қызды зорлаған ауыл мешітінің қызметкеріне қатысты үкім шығарған блолатын. Сот имамды ұзақ мерзімге бас бостандығынан айырды. Қыз жүкті болып қалған.
Оның алдында Алматы облысында да бір имам істі болды. Ол өзгенің сеніп берген ірі көлемдегі ақшасын жеке басына пайдаланып кеткен делінген. Алайда ұзақ уақыт өтіп кетуіне байланысты іс қысқарып, ақша иесіне сол бойы қайтарылмаған көрінеді. Бұл шытырман оқиғадан құлағдар болған муфтьият әлгі ауыл имамын қызметтен босатқан екен.
Қазбалап ақтара берсеңіз имам-молдалардың әр жылдары істеген пендешіліктері мен қылмыстары шығып қалып жатады. Әңгімеміздің басында айтқанымыздай, имамдардың бәрі бірдей ондай емес, әрине. Өкінішке қарай жүзден бірі болса да аракідік жаман ісімен бой көрсетіп қалатыны жасырын емес. Ал бір ғана келеңсіз істің өзі бүкіл имамдардың атын былғайды.