RUS
SMARTNEWS.KZ басылымының хабарлауынша, бүгін Францияда өтіп жатқан Олимпиада ойындарында Париж қаласында жұмыс істеп жүрген бір топ қазақ азаматтары көзге түсті. Олар арнайы Елдос Сметовқа қолдау көрсету үшін жұмыстарынан сұранып, жарысқа келгендерін айтып берді. Бұл туралы Kazinform жазды.
«Біз негізі Батыс Қазақстан облысының жігіттеріміз. Парижде жұмыс істеп жатқанымызға 3 айға жуықтап қалды. Алайда, жұмыс орынымыз қаладан әжептәуір алста, шамамен 50-60 шақырымдай жерде заводта еңбек етіп жатырмыз. Бүгін, Елдос Сметов жарысқа шығатынын естіп, арнайы жұмыс орынымыздан сұранып келдік. Бекер келмеген екенбіз, Елдостің тарихи жеңісіне бірге куә болдық», - дейді қазақ азаматтары.
Сондай-ақ жігіттер алдағы қазақ спортшыларының жарыстарына тағы да келіп, қолдау көрсетуге дайын екендерін жеткізді.
«Біз, тек Елдосқа ғана емес, барлық қазақстандық спортшыларға, отандастарымызға қолдау көрсетуге дайынбыз. Алдағы күндері тағы да жарысқа келеміз. Жерлестерімізге барынша қолау көрсетуге, жанкүйер болуға дайынбыз», - деді олар.
Әңгіме барысында қазақ азаматтарынан неге Парижде жұмыс жасап жатқандарын, алатын жалақы мөлшерін де сұрап қалдық.
«Біз Қазақстанда өліп-талып үш ай жұмыс жасағадағы табатын ақшамызды осында бір айда тауып жүрміз. Қазіргі жұмысымыз өзімізге ұнайды. Үш ай көлемінде елге бір барып тұрамыз», - деді жігіттер.
Естеріңізге сала кетейік, Олимпиаданың алғашқы күні қазақстандық спортшылар ел қоржынына 1 алтын, 1 қола медаль салды.