RUS
SMARTNEWS.KZ басылымының хабарлауынша, ардагер спортшы, қоғам қайраткері Амалбек Тшан бокстан бас бапкердің қателігін турасынан айтты.
Ол Махмұд Сабырхан мен Сәкен Бибосыновтың салмақ дәрежесін өзгерттіргенін, артынша бапкердің осы өрескел қателігі қос боксшыны жеңіліске ұшыратқанын айтты. Бұл туралы ардагер спортшы Assyltas TV арнасына берген сұхбатында айтып берді.
"Екі жағдайға бас жаттықтырушы Мырзағали Айтжановтың кінәсі бар. Тікелей оны айта аламын. Біріншіден, 51 кг-дағы Махмудты 57-ге өткізіп қойды. 57 кг-дағы Сәкенді 51-ге әкелді. Сәкен қай салмақта болса да бойы ұзын. Керісінше оны 57-де ұстау керек еді. Ал Махмуд 51-де болғанда өзбекті де жеңетін еді. Ол бала бір ерекше. Мырзағалидың осы шешімі ешқашан кешірілмейтін нәрсе, тікелей қиянат жасады. Бұл - бір. Кешегі финалдық жекпе-жекті қараңыз. Жұрттың бәрі көрген Украина боксшысының агрессивті түрде ойынын жаттықтырушылар өте жақсы біледі. Жаттықтырушылар неге соған ыңғайлап дайындамады? Боксшыға ең керегі - аяқ. Аяқпен жақсы жұмыс істесе қорғана да алады, шабуылдай да алады. Жарыс басталмай тұрып, дайындауға болар еді. Сол жердің өзінде де ештеңе жасамады. Біздің бала барлық жағынан да басым, бірақ тактикалық жағынан қателік кетті. Соның бәрін айтатын жаттықтырушы сол жерде тұр ғой. Екі боксшы үшін Мырзағали Айтжановты қатты кіналаймын. Бұлардың алтын алатынына күмәнім жоқ еді", - деді ол.
Сондай-ақ, ол Мырзағали Айтжанов әдейі жанына чемпиондарды дайындап шығарған Тұрсынғали Еділовті кеңесші етіп алмайтынын, қазіргі бас бапкер ешкіммен ақшаны бөліскісі келмейтінін айтты.
"Бас жаттықтырушы барлық мәселені өзі шеше береді. Осының бәрін тоқтату керек. Бір адамға билікті беріп, бас иіп отыруды тоқтату керек. Мырзағали Айтжанов неге Тұрсынғали Еділовті қасына шақырып, бас кеңесші етпейді? Қайда жүр ол? Себебі бөліскісі келмейді, бәрі сол дүниенің айналасындағы әңгіме. Майшелпек жегендердің бәрін қуу керек. Олар алатынын алып, ішерін ішіп болды. Олимпиада біткенде кешірім сұрады. Несіне кешірім сұрайды, кету керек ол", - деді ол.