Атыраулық жігіт «танкпен» көшедегі арам шөпті шауып жүр

Техника әскери танк үлгісінде жасалған. Атырау қаласының тұрғыны Бағытжан Досановта Қытайда шығарылған техниканың екеуі бар.

«Жеке кәсіппен айналысып жүрмін. Биыл Атырау қаласының маңындағы Кеңөзек және Алғабас елді мекеніндегі көшеде өскен арам шөпті шабу конкурсына қатысқан едім. Бұл істі атқару үшін бірнеше адамды жұмысқа тарттым. Жұмысшылар арамшөпті «триммер» аппаратымен шапты. Аптап ыстықта арам шөпті шабу оңай емес. Оған тұрақты істейтін жұмысшыларды табу да қиын. Осындай себеппен, интернеттен шөп шабатын техниканы іздестірдім. Сондай екі техниканы Қытайға барып, сатып алып келдім», - дейді Бағытжан Досанов. 

Оның айтуына қарағанда, «танкте» 200 аттың күші бар. Ал, салмағы – 400 келі. 

«Бұл техникамен кез келген шөпті шабуға болады. Пультпен басқарылады. Сол себептен, 50-60 метр қашықтан басқару мүмкіндігі бар. Шынжыр табанды техника жол талғамайды. Су айдындарының жағасынан да, батпақта жерден де шөп шабуға болады. Барлық процес пультпен реттеледі», - дейді Бағытжан Досанов. 

Бір ерекшелігі, «танк» шабылған шөпті уатып жібереді. Ал, жаяу адамға арналған жолдың қарын күреуге болады. 

«Шөп шапқанда, не қар күрегенде бензин қолданамыз. Бір көшеден екіншісіне жеткізу үшін аккумулятормен жүреді. Алдағы жұмыс ауқымы көбейсе, тағы осындай техника сатып әкелемін», - дейді Бағытжан Досанов.