RUS
Сыбайлас жемқорлыққа қарсы іс-қимыл агенттігінің ресми өкілі Данияр Бегайдаровтың мәліметінше, қаржы жымқырудың ең көп мөлшері Жетісу, Түркістан, Қызылорда, Алматы, Ақтөбе облыстары мен Алматы қаласында анықталған. Жемқорлық қылмыс жасаған 386 адам әшкереленіп, 207-і адам сотталыпты.
Антикордың ресми өкілі Қызылорда облысы Жаңақорған ауданы білім бөлімінің бұрынғы басшысы мен оның қарамағындағыларға (бас бухгалтер, бас экономист және 24 мектептің бухгалтері) қатысты сотқа дейінгі тергеу аяқталғанын айтты.
«Олар мектептерде іс жүзінде еңбек қызметін жүзеге асырмаған адамдарға жалақы аудару арқылы 213 млн теңге сомасында бюджет қаражатын жымқырған деп айыпталуда. Бұдан басқа, Білім бөлімінің бас бухгалтері қылмыстық жолмен алынған 6,5 млн теңге сомасындағы ақшалай қаражатты заңдастырды деген күдікке ілінді. Қазіргі уақытта қылмыстық іс сотқа жіберілді», - деді ол.
Айтпақшы, Тараз қаласы Политехникалық колледжінің директорына қатысты сотқа дейінгі тергеудің аяқталғаны да белгілі болды.
«Колледж директорына «Бағдарламалық қамтамасыз ету» мамандығы бойынша талапкерге жалпы білім беру грантын беруге көмектескені үшін пара алды деген айып тағылды. Қылмыстық іс материалдары сотқа жолданды», - деді Д. Бегайдаров.