RUS
Келісім еліміздің аумағындағы телекоммуникация, энергетика, мұнай-химия, көлік, қаржы және басқа да салаларда 9 бірлескен нақты инвестициялық жобаны іске асыруды көздеп отыр.
Атап айтсақ, «Қашаған» кен орнындағы газ өңдеу зауыттарын, Қостанай облысындағы компрессорлық станция мен магистральдық газ құбырын, «Бейнеу-Бозой-Шымкент» магистральдық газ құбырының екінші желісін, Ертіс өзеніндегі су электр станциясын, Қызылорда облысындағы электр станциясын салу жөніндегі жобалар, сондай-ақ, «Береке Банк» акционерлік қоғамының 100% акциясын және «Мобайл Телеком-Сервис» жауапкершілігі шектеулі серіктестігінің 100% қатысу үлесін сатып алу бойынша жобалар қамтылған.
«Келісімде Қазақстан Республикасы Үкіметінің бірқатар міндеттемелері көзделгенін атап өткенім жөн. Мәселен, Үкімет Келісімнің шарттарын өзгертіп, кедергі келтіретін және жоя алатын заңнамалық актілерді қабылдай алмайды», - деді сенатор Бибігүл Аққожина.
Сурет: senate.parlam.kz
Айта кетейік, келісімді жүзеге асыру жалпы сомасы шамамен 20 млрд АҚШ долларын құрайтын инвестицияларды тартуға мүмкіндік бермек. Қызығушылық танытқан инвестициялық жобалар талаптарға сай болуы және белгілі бір кірістілік деңгейіне жетуі қажет. Келісім аясында Қазақстан стратегиялық инвестициялық жобаларды іске асыруға жәрдемдесу үшін жабдықтарды, шикізаттар мен материалдарды әкелу кезінде кедендік баждарды төлеу жөніндегі міндеттемелерден босату, сондай-ақ Қазақстан заңнамасында көзделген салық жеңілдіктерін ұсынбақ. Бұл ретте инвестор осы Келісім күшіне енген күннен кейін, қандай да бір жаңа салықтарды төлеуге немесе Қазақстан заңнамасында енгізілген қандай да бір басқа төлемдерді жүзеге асыруға міндетті емес. Стратегиялық инвестициялық жобаларды іске асыру кезеңінде және одан кейінгі 20 жыл ішінде Қазақстан Республикасының трансферттік баға белгілеу туралы заңнамасы инвесторларға қолданылмайтыны туралы атап өткен жөн.