RUS
SMARTNEWS.KZ басылымының хабарлауынша, бүгін түнде Азат ауылындағы марқұм Шерзат Болаттың үйі отқа оранған еді.
Қазір оқиға орнында полицейлер, олардың кейбірі қару асынғандар, сондай-ақ өрт сөндіру зертханасының қызметкерлері мен төтенше жағдайлар департаментінің анықтау бөлімі жүргені белгілі болды.
Одан бөлек "Письма Президенту" Telegram-арнасы оқиға орнына Алматы облысының прокуроры Берік Адамов келгенін жазды.
"Қаза тапқан жасөспірімнің үйінде өрт болған жерге Алматы облысының прокуроры Адамов Берік келіп, қаза тапқан баланың әкесімен кездесті. Кездесу барысында облыс прокуроры Шерзаттың әкесіне көңіл айтты. Істі ерекше бақылауға алатыны туралы уәде беріп, арнайы прокурорлар басқармасының ведомствоаралық тергеу-жедел тобының қызметкерлерін таныстырған. БАҚ өкілдерінің аталған іске ерекше назар аударып отырғанын ескертіп, тергеу іс-шараларына кедергі етпес үшін әкесіне және жақын туыстарына оқиға орнынан кетіп, артық түсініктеме бермеуін айтқан, - деп мәлімдеді "Письма Президенту" Telegram-арнасы.
Бұған дейін Алматы облысының әкімдігі түнде үйін өрт шалған Шерзат Болаттың отбасына көмек көрсетілетінін мәлімдеген еді.
Алматы облысының әкімдігі баспанасын өрт шалған Ш. Болаттың отбасына тұрғын үйді қалпына келтіруге көмектесетін болды.
Сонымен қатар, оларға жөндеу жұмыстары аяқталғанша уақытша баспана беріледі, - деп мәлімдеді.
Айта кетейік, 2024 жылы 12 қазанда жәбірленушілердің үйі өртегеннен кейін Бас прокурор қылмысты ашу үшін ведомствоаралық тергеу-жедел тобын құрды.
“Қылмыскерлерді әшкерелеу үшін барлық шаралар қабылданады. Қылмыстық істі Қазақстанның Бас Прокуроры бақылауға алды”, – делінген хабарламада.
Сондай-ақ Алматы облысының полициясы марқұмның отбасын күзетпен қамтамасыз ететін болды. Полиция мәліметінше, отбасын қорғау үшін олардың тұрғылықты жерінде тәулік бойы жұмыс істейтін полицейлер кезекшілігі ұйымдастырылды.
Содан кейін өрт кезінде отбасы мүшелерінің үйде болмағаны хабарланды. Полиция мәліметінше, жерлеу рәсімінен кейін отбасы мүшелері Талғар ауданында тұрып жатыр. Ал өрт Еңбекшіқазақ ауданы, Азат ауылында болған.
Төтенше жағдайлар министрлігі үйдің өртке орануына қатысты пікір білдірді.
“12 қазанда сағат 00:50-де Алматы облысы, Еңбекшіқазақ ауданы, Азат ауылында тұрғын үй өртенді. Оқиға орнына дереу Алматы облысының 10 қызметкері мен үш бірлік апатты жою техникасы жіберілді. Алғашқы өрт сөндіру бөлімі сағат 01:08-де жеткенде тұрғын үйдің шатыры жанып жатқаны анықталды. Үй толығымен өртке оранды. Қабылданған жедел іс-шаралармен өрт 01:38-де оқшауланды. Сағат 01:43-те 56 шаршы метр аумақтағы өрт сөндірілді. Зардап шеккендер жоқ", – делінген хабарламада.