RUS
SMARTNEWS.KZ басылымының хабарлауынша, Шерзат Болаттың өлімінен соң Талғарда митинг өткен болатын. Алғашқы митинг күні марқұмның әпкесі Перизат Нурумова полиция қызметкеріне қауіпсіздік үшін күзет қоюын сұраған. Бірақ бұл өтінішті ведомство елемеген.
Әуелі баласынан, артынша үйінен айырылған қаралы отбасыға өрт оқиғасына дейін қорқытып, қоқан-лоқы көрсеткендер көп болған. Бұл туралы марқұм Шерзаттың әпкесі Перизат Нурумова Stan.kz басылымына телефон қоңырауы арқылы айтып берген.
“Полицияның үйді күзетке қазір алғанының пайдасы қанша?! Бірінші күні митингке шыққанда “неге күдіктілердің үйіне күзет қоясыздар? Тым құрығанда біздің ауылдың кіре беріс жеріне, кімнің кіріп-шыққанын бақылау үшін күзет қойыңыздар. Бізге қоқан-лоқы, қорқытулар болып жатыр” деп айттық. Сол кезде "қарастырып жатырмыз" деген.
Шалқаров мырзаға да айтылған еді. Міне сол кісілердің бір жетіде жасаған “адал еңбегінің жемісі" осы”, – деді әпкесі.
Перизат Нурумованың айтуынша, полиция керісінше күдіктілердің үйіне күзет қойып, оларды қорғап отыр екен.
“Полиция керісінше күдіктілердің үйіне күзет қойып, оларды қорғаштап жүргенде, біз бала тұрмақ, үйімізден де айырылып қалдық. Қоқан-лоқы болып жатыр деп неше күннен бері айтылып жатыр. Шалқаров мырзаның айтуынша “7 адам қамауда” дейді болды. Ал екі қыз адвокатпен келіп кетіп жүр. Олар толық бәрін ұстамағанының кесірі осының бәрі.
Үйге барып анамызға айтайын десек қобалжып жүрміз. Анама бәрін түсіндіріп айттым. Қазір төсек тартып жатып қалды. Үйден түк қалмады, тек қабырғасы қалды”, –дейді марқұмның әпкесі.