RUS
Оқу-ағарту министрлігі Мектепке дейінгі білім беру департаментінің директоры Манара Адамова Орталық коммуникациялар қызметінде өткен баспасөз мәслихатында балабақша басшылығына шағымданған ата-аналардың аз емес екенін айтты.
«Биыл қазан айына дейін мектепке дейінгі білім беру ұйымдарында 17 заң бұзу фактісі анықталды. Жалпы, балалардың құқығын, қауіпсіздігін бұзатын бір де бір оқиға болмауы керек. Оны біз түсінеміз. 11 600 мектепке дейінгі ұйым бар десек, 17 оқиға деген 0,001 пайыз деген сөз. Былтыр 38 жағдай болса, биыл 9 айда 17 оқиға тіркелді. Яғни, азайған», - деді ол.
Оның айтуынша, ата-аналар көбіне тәрбиешілердің балаларға дөрекі қарауы бойынша шағымданады.
«Ондай жағдайлар өте көп. Бірақ бұл жерде ата-ана да тәрбиешілерімен өзара байланыста болу керек. Егер бала кешке дейін жылап жүрсе, үнемі мазасыз болса, бұл тек балабақшада жасалған жағдаймен ғана байланысты болмауы мүмкін. Сондықтан баланың негізгі тәрбиесі, көңіл-күй отбасында қалыптасатынын ұмытуға болмайды. 17 жағдайдың ішінде 10 тәрбиеші жұмыстан қуылды. Басқа жағдайларда екі тарап татуласты», - деді Манара Адамова.