RUS
Жыл сайын түрлі аурулардан көз жұматын әйелдердің қатары азаймай тұр. Бұл ретте, Денсаулық министрлігі мамандары әйелдерді уақтылы скринингтен өтуге үндеуде.
Бүгінде сүт безі обыры онкологиялық аурулардың ең көп таралған түрлерінің біріне айналып отыр. Қазақстанда тек 2023 жылы сүт безі обырының 5,5 мыңнан астам жаңа жағдайы анықталған. Бір жылдың ішінде бұл аурудан 1 мыңнан астам әйел көз жұмған.
«Сүт безі обырын ерте кезеңде уақтылы диагностикалау кезінде әйелдердің толық емделуі 95%-ға жетеді. Бұл аурудың профилактикасы және ерте диагностикалау мақсатында 40 пен 70 жас аралығындағы әрбір әйел 2 жылда 1 рет сүт безі обыры бойынша маммологиялық скринингтен өтуі керек», - делінген министрлік хабарламасында.
ДДСҰ деректері бойынша, бұл обыр қатерлі ісік диагноздарының 21%-ын құрайды. Әлемдік статистикаға сәйкес жер шарындағы әрбір сегізінші әйел сүт безі обырымен ауырады.
Әйелдердің осы қауіпті ауру туралы хабардар болуы үшін жыл сайын 15 қазанда Дүниежүзілік сүт безі обырымен күрес күні атап өтіледі.