RUS
Ірі шаруашылықтар болса дер кезінде демеу қаржыға қол жеткізіп, шаруасын дөңгелетіп отыр. Жауапты органдар болса ол мәселе онлайн түрде өтініш беру арқылы шешілетінін алға тартып, өздеріне шаң жуытқысы жоқ.
ҚР Сыбайлас жемқорлыққа қарсы қызметтің Жамбыл облысы бойынша департаменті облыс әкімдігінің ауыл шаруашылығы басқармасы тарапынан субсидия өтінімдерін қарау кезінде кезектілікті сақтамау фактілерін анықтады.
Субсидиялау саласына жүргізілген мониторинг барысында субсидия төлеу кезінде кезектілікті жүйелі түрде сақтамау, субсидияны уақтылы төлемеу және жекелеген шаруаларға артықшылық көрсету түріндегі жемқорлыққа алып келетін тәуекелдер тіркелген.
Мысалы, 2023 жылғы шілде айында кезекке тұрған ауыл шаруашылығы тауар өндірушілерінің өтінімдерінен бұрын, кезекке кейінірек тұрған, яғни 2023 жылдың қазан айындағы өтінімдер қаралып, оларға субсидия төленгені белгілі болды.
Аталған кемшіліктер субсидиялаудың бірыңғай мемлекеттік ақпараттық жүйесі мен «Қазынашылық» ақпараттық жүйелері арасында интеграцияның жоқтығынан және жекелеген қызметкерлерде дискрециялық өкілеттіктердің болуынан орын алған.
Департаменттің ұсынысынан кейін облыстық ауыл шаруашылығы басқармасы субсидия төлеу бойынша төлем құжаттарын қарау алгоритмін бекітті және дер кезінде қаралмаған 243 ауыл шаруашылығы тауар өндірушілерінің субсидиялары төленді.