RUS
SMARTNEWS.KZ басылымының хабарлауынша, ҚР Мемлекеттік қызмет істері агенттігінің Батыс Қазақстан облысындағы Әдеп жөніндегі кеңесінің отырысында Ақжайық ауданы Жаңабұлақ ауылдық округінің әкімі Жамбыл Дабысқалиевтің тәртіптік ісі қаралды. Бұл туралы Kazinform жазды.
ҚР Мемлекеттік қызмет істері агенттігінің БҚО бойынша департаменті жүргізген қызметтік тергеп-тексеру барысында анықталғанындай, округ әкімі Ж.Дабысқалиев биылғы 1 қыркүйек күні ауыл тұрғыны Мереке Есқалиевке қатысты балағат сөз айтуға жол берген.
Ж.Дабысқалиевтың түсініктемесінен мәлім болғанындай, Жаңабұлақ тұрғындары көптеген жиналыстар мен жеке қабылдауларда ауылдың тазалығы мен қауіпсіздігін сақтау, асфальт жолды бұзбау үшін үлкен техникаларды кіргізбеу керектігін сұраған. Содан кейін ауыл ішінде жүк көліктерінің қозғалысын шектеу жөнінде өзара келісімге келген. Алайда 1 қыркүйек күні Жаңабұлақ ауылдық округі әкімі аппаратының күзетшісі ауыл ішінде шөп тиеген жүк көлігі жүргенін хабарлаған. Ауыл әкімі жүк көлік иелерімен сөйлесіп, ауыл ішіне айналма жолдар арқылы кіруге болатынын жеткізген. Сол жерде М.Есқалиев сөзге араласып, шөп алып келсе, ауыл ішімен жүретінін алға тартып, әкімге балағат сөздер айтқан.
Әдеп жөніндегі кеңес отырысында Ж.Дабысқалиев көңіл-күй ауанына беріліп, өзінің балағат сөз айтып қалғанын мойындады.
Кеңес мүшелері талқылай келе, Ж.Дабысқалиевке сөгіс түріндегі тәртіптік шара қолдану туралы тоқтамға келді.
Әдеп жөніндегі кеңес отырысында басқа да мәселелер қаралып, тиісті шешімін тапты.