RUS
SMARTNEWS.KZ басылымының хабарлауынша, 26 қазанда "Ордабасы" мен "Жеңіс" клубтары арасында Қазақстан премьер-лигасының ойыны өтті. Елордалық клуб аутсайдер болғанымен бұл кездесуде стадион қожайындарынан 1:2 есебімен басым түсті.
Бұл жеңілістен кейін "Ордабасы" футбол клубының капитаны Асхат Тағыберген мен команда ойыншысы Ғафуржан Сүйімбаев шымкенттік жанкүйерлермен ерегесіп қалды. Чемпиондыққа басты үміткер саналатын клубтың бұл жеңілісіне көңілі толмаған жанкүйерлер ашуланды.
Аталған сәттің видеосы әлеуметтік желіде тараған. Ал өзге ойыншылар бұл сәтте үнсіз қарап тұрған.
"Бізге де оңай емес. Көріп жатырсыңдар ғой, еріккеннен ойнап жатқан жоқпыз. Қақпаға доп кірмей қойды. Сен неге мені балағаттап тұрсың? "Еу" деп айтпа маған", – деп ызаланды команда капитаны.
Айта кетейік, шымкенттік "Ордабасы" клубы былтырғы ел біріншілігінің чемпионы атанған болатын.
Биыл да турнир кестесінде көш басында келе жатқан шымкенттік клуб қатарынан 2 матч жеңіліс тауып, бірден 3-орынға түсіп қалды. Ал Қазақстан премьер лигасының көш басында 41 ұпаймен "Қайрат" тұрса, 2-орында "Астана" (40 ұпай) командасы келеді.