RUS
SMARTNEWS.KZ басылымының хабарлауынша, Жаңаөзендегі "Кезби" мұнай сервисі жұмысшылары ереуілге шықты. Олардың жұмысқа шықпағанына бір тәулік өткен. Ереуілге шыққан мұнайшылар осылайша кәсіпорынның жұмысын тоқтатып тастады. Аталған жағдай туралы Оrda.kz порталы жеткізді.
Компания басшысы Ержан Кезбаевтың айтуынша, қазір басшылық жұмысшылармен келіссөздер жүргізіп жатыр.
“Жаңа кәсіпорын ашуды талап еткен 96 адам ауысымға шықпады. Бұл ереуілдің белсенділері қазір жаңадан құрылған компанияның жетекшісі болғысы келеді. Олар механик-машинист болып жұмыс істейді. "Кезбидегі" жұмыс тоқтаған жоқ. Қазір адамдармен келіссөздер жүргізіп, келісімге шақырдық”, – дейді ол.
Сондай-ақ Ержан Кезбаев ереуілге шыққан қызметкерлер орташа 800 мың теңге айлық алатынын айтады.
“Жалақы уақытылы әрі төлемдері беріледі. Кезбиде 1200 адам жұмыс істейді, жүзге жуық адам ереуілге шықты”, – дейді компания басшысы.
Маңғыстау облысының әкімдігі кәсіпорынның жекеменшік екенін алға тартып, жауап беруден бас тартты.
"Кезби" – тәуелсіздік алғаннан кейін Қазақстанда ашылған алғашқы жеке фирмалардың бірі саналатын мұнай сервистік компаниясы. Компанияның тіркеу құжаттары 26 жыл бұрын, 1998 жылы берілген.
Компанияның бірінші директоры және қазіргі құрылтайшысы – Бітім Кезбаев. Ол кәсіпқой кенші. Еңбек жолын "Маңғышлақмұнайгазбарлау" тресінде бұрғылаушы болып бастаған. Ал 2012 жылы ол Forbes бойынша "Үздік кәсіпкерлер" тізіміне енді.
Кәсіпорын қызметкерлерінің ереуілге шығуы бірінші рет емес. Бұған дейін де мұнайшылар еңбек жағдайларын жақсартуды және жалақыны көтеруді талап етіп, бірнеше рет шеруге шыққан.