RUS
«Бүгінде республикалық маңызы бар автожолдар желісінің жалпы ұзындығы 25 мың шақырымды құрайды. 3,6 мың шақырым күре жолда қайта жаңарту және күрделі жөндеу жұмыстары жүргізілуде. 3,2 мың шақырым ақылы учаскелерді қоса алғанда, жалпы ұзындығы 21,4 мың шақырым автожол күтіп-ұстау жұмыстарымен қамтылған. Биыл 63 мың тонна техникалық тұз, 104 мың текше метр құм, 172 мың текше метр қиыршық тас қалдығы, 1,2 мың тонна химиялық реагент дайындалған. Былтырғы жылмен салыстырар болсақ, көктайғаққа қарсы материалдың көлемі 3 есе ұлғайған», - деді «ҚазАвтоЖол» басшысы ОКҚ алаңында өткен баспасөз мәслихатында.
Компания басшысы республикалық автожолдарда жыл бойы үздіксіз қызмет көрсететін ұйым – «КАЖСервис» ЖШС екенін атап өтті.
«Қысқы күтіп-ұстау жұмыстарына дайындық тиянақты ұйымдастыруды және құбылмалы климат жағдайында жедел әрекет етуге дайын болуды қажет етеді. Мұндағы негізгі аспектілердің бірі – жол техникасымен қамтамасыз ету. 2022 жылы «ҚазАвтоЖол» ҰК» АҚ мен «КАЖсервис» ЖШС-ін біріктіру үрдісі басталған кезде техниканың жалпы саны небәрі 1100 болған. Бұл нормативті қажеттіліктің тек 25% құрайды. Бүгінде техника паркі кеңейіп, саны 1718 бірлікке, яғни 39% жетті. Бұл саладағы жаңарту және модернизациялау жұмыстары әлі де жалғасуда», - деді Д.Иманашев.
Сондай-ақ спикер ұзақ жылдар бойы жасалған талдауларға негізделе отырып, қар басу қаупі бар 2,2 мың шақырым учаске анықталғанын айтты. Бұл жерлерге 31 мың уақытша ағаш қалқандар орнатылып, қар қоршаулары мен біліктері жасалмақ.
Басқарма төрағасының айтуынша, ауа-райы күрт өзгерген жағдайда, қалыпты көлік қозғалысын қамтамасыз еткенге дейін жолда қалған жолаушылар уақытша орналастыруға арналған қауіпсіз және жайлы жылыту пункттеріне тоқтай алады. Автожолдардағы ағымдағы ахуал туралы өзекті ақпаратты тәулік бойы жұмыс жасайтын 1403 байланыс орталығы, Sapar мобильді қосымшасы немесе Kaztoll.kz сайты арқылы білуге болады.
Бұдан бөлек былтыр қыста қар құрсауынан 2 мың автокөлік шығарылып, 3 мыңнан астам азаматқа көмек көрсетілгені аталып өтті.