Астық көп, сақтайтын орын жоқ: Диқандар Президенттен көмек сұрады

Диқандар жергілікті әкімдіктен көмек болмаған соң әлеуметтік желіде жазба жариялап, Президенттен көмек сұрады. 

«Ана жерде бидай жатыр, әрі қарай арпа үйілген. Осылайша жиналған астықты қырманда сақтауға тура келіп жатыр. Мұның бәрі бүлініп, шіріп жатыр. Өйткені жақын маңдағы элеваторлардың барлығы толық, бидайды қабылдамай жатыр. Олар артатын вагондар жоқ дейді. Былтырғы жыл да қиын болды. Жинап алған астықты былтыр да дұрыс іске жарата алмадық. Биыл оқиға қайталанып жатыр. Сіз неге бұл жүйелі түрде қайталанатынын анықтап, тәртіпке салсаңыз екен. Бұл жүйелі түрде жылдан жылға қайталанатын мәселе, шешілмей жатыр. Күзгі орақ басталғанда біздегі бар вагондар жоқ болып кетеді. Элеваторлар бірден толып қалады. Жақсы өнім алған жылы үнемі осылай. Мәселені шешуіңізді сұраймын», - дейді кәсіпкерлер. 

Диқандар бұл мәселе жедел шешілмесе, банк алдындағы берешектерін қайтара алмайтынын алға тартып отыр.

«Камаз көлігінің жүргізушілері бидайды жақын маңдағы элеваторға жеткізу үшін әр келісіне 5 теңге сұрайды. Делдалдар бидайды элеваторға кіргізу үшін әр келіге 10 теңге алады. Бидайдың өз бағасы – 40 теңге. Соның жартысын элеваторға кіргізу үшін беру өте қымбат. Сондықтан шара қолданып, жағдайды реттеуді сұраймын», - дейді диқандар. 

Синоптиктер алдағы күндері қар аралас жаңбыр жауатынын болжап отыр. Бұл мәселе жедел шешілмесе, Солтүстік Қазақстан облысының диқандары банкрот болуы мүмкін.