RUS
SMARTNEWS.KZ басылымының хабарлауынша, Азия чемпионатында 4 дүркін жеңіске жеткені үшін әлем сарапшылары арасында «Азия сойқаны» атанып кеткен Төрехан Сабырхан кеше ғана әлем чемпионы атағын алды. Енді бүгін чемпионның ат ерттеп, қора тазалап жүргені жанкүйерлерін қатты таңғалдырды.
67 келі салмақта жұдырықтасып жүрген Төрехан Сабырхан Қаратау еліндегі (Черногория) әлем чемпионатынан орала сала үй шаруасына кірісіп кеткен. Әлеуметтік желіде жарияланған видеодан Төреханның ат ерттеп, даладағы жұмыстарды атқарып жүргенін көруге болады. Желі қолданушылары оның қарапайымдығы мен тәрбиесіне тәнті болды.
"Түзде мейлі кім бол, ата анаңның үйінде әрдайым қызметте болу керек! Ұлық болсаң кішік бол деген осы! Әр спортшымыз осындай тәрбиеде болса шіркін", "Құдай қаласа Олимпиада чемпионы бол", "Керемет тәрбие, тәртіп", "Алтын жігіт қой", "Өте қарапайым, жарайсың", "Осындай тәрбие берген ата-анасына рақмет", "Ауылдың қарапайым баласы. Әрқашан да осындай қарапайым, кішіпейіл бол", - деп жазды желідегілер.
Еске салайық, Төрехан Сабырхан былтырғы әлем чемпионы, биыл Париж олимпиадасына қатысқан Махмұд Сабырханның туған інісі. 2006 жылы туған жалынды боксшы Төрехан осыған дейін бірде-бір рет жеңіліп көрмеген чемпион.
Ол бұған дейін жастар мен жасөспірімдер арасындағы Азия чемпионатына 4 рет қатысып, төртеуінде де алтын медальға ешкімнің қолын жеткізбей, бір өзі алқалап әкеткен абсолют чемпион. 4 дүркін жеңісі арқылы Қазақстан рекордын жаңартқан былғары қолғап шебері.
Аталған рекордынан соң Төрехан әлем сарапшылары арасында «Азия сойқаны» (Asian Storm) атанып үлгерген. Бұл есім оның кез келген қарсылас алдында ширақ та, шапшаң қозғала жүріп, сойқан жұдырықты дәл беріп үлгеретін қарқыны үшін қойылса керек. Кеше ғана Қаратау елінде өткен жастар арасындағы әлем чемпионатында да Төрехан ерекше техникасымен жанкүйерлер есінде ерекше қалған үздік боксшы болды.