RUS
Аталған іс-шарада Қуандық Бишімбаевтың ісінде мемлекеттік айыптаушы болған Айжан Аймағанова мәселе көтерді.
Ол кейінгі кезде жастар арасында құқық бұзушылықтың көбейуі байқалатынын айтты. Зорлық-зомбылық, вандализм, бұзақылық фактілері мен балаларға қатысты қылмыстардың артуы алаңдатып отырғанын жасырмады.
«Бұл бізге моральдық, психологиялық тұрғыдан өте ауыр. Бір жағынан, ана ретінде аяғын шалыс басқан жастардың болашағына уайымдаймыз. Екінші жағынан, заңгер ретінде жаның ауырады. Қалай десек те, заңды шешім шығарып, жастарды тура жолға салуға тырысамыз. Бірақ біздің балаларымыз неге заң бұзады? Неге қатігездік танытады? Осы ойлар мені көп мазалайды. Бұдан бір түйгенім, отбасында тәрбие құлдырап тұр, – деді ол.
Прокурор халықты қоғамда құқықтық мәдениетті насихаттауға белсенді атсалысуға шақырды. Осылайша, Аналар кеңесі аясында «Тәртіпті өзіңнен баста!» қоғамдық акциясын бастауды ұсынды. Мақсаты – жастар арасында құқықтық мәдениетті қалыптастыруға үндеу, құқық бұзушылық пен тәртіпсіздіктің алдын алу, қоғамда заң мен тәртіп үстемдігін насихаттау.