RUS
SMARTNEWS.KZ басылымының хабарлауынша, бүгін Ақтөбе облысы Сарыжар ауылының маңында Әуе қорғанысы күштері әскери институтының Ми-8 тікұшағы оқу-жаттығу ұшуларын орындау кезінде апатты жағдайда қонды.
Бортта болған 3 адамның біреуі қаза болған. Екеуі аурухананың жансақтау бөлімінде жатыр. Белгілі болғандай, екеуі де есін біледі. Ақтөбе облыстық денсаулық сақтау басқармасы баспасөз қызметі екі науқасқа қатысты мынадай мәлімдеме жасады.
— Зардап шеккен екі адамның жағдайы тұрақты ауыр. Екеуі де есін біледі, сұрақтарға жауап беріп жатыр. Ұшақтың құлағаны туралы ақпарат 103 қызметіне сағат 11:36–да түсті. Оқиға орнына Мәртөк аудандық ауруханасынан жедел бригада жетті. Бір адам жедел жәрдем барғанша көз жұмған. Ал екеуін аэродромнан күтіп алып, күйік шалқан науқастарды облыстық көпсалалы ауруханаға жеткізді. Қазір реанимация және интенсивті терапия бөлімінде жатыр. Түрлі диагностикадан өтеді, — деп хабарлады Ақтөбе облыстық денсаулық сақтау басқармасы баспасөз қызметі.
Төтенше жағдайлар министрлігінің дерегінше, оқиға сағат 11:40 шамасында болған. Сол уақытта 112 нөміріне ауыл маңында тікұшақ құлағаны туралы хабар келіп түскен.
— Ақтөбе облысы Мәртөк ауданы Сарыарқа ауылының ауданында тікұшақтың қонғаны туралы хабарлама келіп түсті. Әуе кемесі болжам бойынша ҚР Қорғаныс министрлігіне тиесілі. Оқиға орнына ТЖД жеке құрамынан 23 адам мен 5 бірлік техника жіберілді. Оқиға орнына келген ТЖМ құтқарушылары өртті сөндірді. МИ — 8 тікұшағының бортында 3 адам болған. Олардың біреуі қайтыс болды. Зардап шеккен екі адам Ақтөбе қаласына ҚР ҚМ ЯК-40 ВОСВОД ұшағымен жеткізілді, — деп хабарлады ҚР ТЖМ.
Қорғаныс министрлігі Ақтөбе облысында тікұшақ апатына қатысты ресми хабарлама жасады.
— Экипаж мүшелерінің бірі қаза тапты. Авиациялық оқиғаның алдын-ала себебі — техникалық ақаулық. Оқиғаның мән-жайы анықталуда. Жергілікті жерде ведомствоаралық жедел топ жұмыс істеуде. Қарулы күштердің басшылығы мен Әуе қорғанысы күштерінің қолбасшылығы қаза тапқан әскери қызметшінің туыстары мен жақындарына көңіл айтады, — делінген министрлік хабарламасында.
Ведомство атап өткендей, оның туыстарына, сондай-ақ зардап шеккендерге барлық қажетті көмек көрсетіледі.