RUS
SMARTNEWS.KZ басылымының хабарлауынша, атақты Хәллиуд актері Том Хэнкс республикашыл Дональд Трамптың президенттік сайлауда жеңіске жетуіне байланысты АҚШ-тан кетіп қалды. Бұл туралы Kazinform жазды.
The Direct басылымының дерегінше, аталған хабарлы актер өзінің қоштасу хатында жазған.
– Мен ауыр жүрекпен және одан да ауыр чемоданмен хабарлаймын: мен елден ресми түрде кеттім, – деп жазған актер.
Хэнкстің айтуынша, Трамптың Ақ үйге оралуы актер үшін трагедия.
– Сайлау нәтижелерін көргенде мен өз-өзіме: «Жүгір, Форрест, жүгір!» дедім. Мен дәл солай істедім, – деп қосты ол өзі басты рөлді сомдаған фильмдегі Форрест Гампты меңзеп.
Актер жанкүйерлерін АҚШ-тан біржола кетті деп ойламауға шақырып, Трамптың президенттік мерзімі аяқталған соң елге оралуы мүмкін екенін айтты.
Анықтама үшін, Томас Джеффри Хэнкс – американдық театр, кино, теледидар актері, продюсер, кинорежиссер, сценарист және жазушы.
Хэнкс өзінің актерлік мансабын теледидарлық және комедиялық фильмдердегі рөлдерден бастады. Ол «Филадельфия» (1993) және «Форрест Гамп» (1994) фильмдеріндегі басты рөлдері үшін «Үздік ер адам рөлі» номинациясы бойынша Оскар сыйлығын жеңіп алған.
Айта кетейік, Дональд Трамптың жеңісінен кейін Леди Гага, Барбара Стрейзанд, Тейлор Свифт, Майли Сайрус, Карди Би, Пинк және т.б. Хәллиуд жұлдыздары елден көшу туралы ойланып жатқандарын жеткізген еді.