RUS
SMARTNEWS.KZ басылымының хабарлауынша, қазақстандық жартылай қорғаушы Бақтиер Зайнутдинов ойнайтын Түркияның «Бешикташ» клубы соңғы көрсеткіштері көңіл көншітпей жүр.
Түркиялық БАҚ дерегінше, клуб бапкері Джованни ван Бронкхорст өзіне ұнамайтын ойыншылардың тізімін жасап, оны басшылыққа бергелі жатыр деген ақпараттар пайда болды. Мұндай хабарды жеткізгендердің бірі түркиялық Sözcü басылымы.
Бапкердің «дизлайк» тізіміне Бақтиер Зайнутдиновтен бөлек, легионерлерден камерундық Жан Онана пен аустриялық Джан Келеш, сондай-ақ жергілікті ойыншы түрік Онур Булут кіреді деген болжам пайда болған. Бұлардың бәрі ойын кезінде алаңға сирек шығатын футболшылар көрінеді.
«Ван Бронкхорсттың есебіне сәйкес, клуб басшылығы бұл футболшылармен қош айтысу туралы шешім қабылдайды. Осыдан соң «Бешикташ» басшылығы құрамды күшейту үшін жаңа трансферге мән бере бастайды», — деп жазды БАҚ.
Еске салайық, Бақтиер Зайнутдиновтың стамбұлдық клубтан кететіні туралы биыл жазда айтылды. Тіпті, оны ресейлік ЦСКА немесе «Зенит» сатып алатыны да сырттай шешілген.
Алайда, қазақстандық футболшы қандай жағдай болмасын, Ресейге бармайтынын мәлімдеді. Артынша оның «Бешикташ» сапында мансабын жалғастыратыны белгілі болған еді.