RUS
Оқиға Астана қаласындағы №27 гимназия мектебінде болған. Анасының айтуынша, оның қызы мектептен қайтып келе жатқанда есік алдына құлап қалған. Алғашында баланы көшеде біреу ұрып-соққан деп ойлаған, бірақ қызы өзін жайсыз сезіне бастағаннан кейін жедел жәрдем шақырып, оның антибиотиктерден уланғанын білген.
«Дәрі қабылдау үшін мектеп мейірбикесі қызымды шақырып алған. Үйде оңайлықпен дәрі ішуге келісе қоймайтын қызыма медицина қызметкері бірден сегіз түйір дәріні мәжбүрлеп ішкізген», дейді қыздың анасы Ақтамақ Аппас.
Бала есін жиған кезде ата-ана 27-ші гимназия мектебінің басшылығынан түсініктеме алуға тырысқан. Бірақ анасының айтуынша, ол директордың қабылдауына кіре алмаған. Қазір Денсаулық сақтау министрлігі бұл оқиғаны зерттеп жатыр.
Денсаулық сақтау вице-министрі Ержан Нұрлыбаевтың айтуынша, аумақтық комитет қызметтік тексеру жариялады.
Оқушы қызға дәрі берген медицина қызметкері оқу орнының өзінде емес, қалалық емханалардың бірінде жұмыс істейді. Антибиотикпен емдеуді фтизиатр дәрігер тағайындаған, себебі қыз бір жылдай бұрын туберкулезбен ауыратын сыныптасымен байланыста болған.
Бүгінде қыздың анасы прокуратураға арыз жолдап үлгерген.