RUS
SMARTNEWS.KZ басылымының хабарлауынша, Талғарда кісі қолынан қаза тапқан Шерзат Болаттың отбасын қорғаушы адвокаттар мен Айтбек Амангелді әлеуметтік желіде тікелей эфирге кірді. Олар эфирде тергеу барысына қатысты мәліметтерді айтып, соттың ашық өтетініне сенімділік білдірді.
Тікелей эфирді қаралы отбасыға көмектесіп жүрген Айтбек Амангелді жүргізіп, құқық қорғаушыларға кезегімен сөз беріп отырды. Ол қорғаушыларды соңғы кезде көп телебағдарламалар шақырып жүргенін, бірақ бәрінен бас тартатындарын мәлімдеді.
Эфирде алдымен сөз алған бірінші адвокат Карина Көшербаева дүкендегі жанжалдың провокациялық үзінділері көрсетілген бейнебақылау жазбасын желіге таратқандарға байланысты тергеу шаралары жүріп жатқанын айтты.
«14 қазан күні instagram-дағы SONA.KZ парақшасында оқиға болған Қамажай дүкеніндегі бейнебақылау камераларына түсіп қалған жанжал тарап кеткен болатын. Біз бұны біле салысымен Ішкі істер министрлігіне шағым түсірдік, арызымыз қаралып жатыр. 16 қазан күні 423-бап яғни сотқа дейінгі іс жүргізудің немесе жабық сот талқылауының деректерiн жария ету бойынша іс қозғалды. Іс Алматы облысы полиция департаментінің қауіпсіздік қызметіне берілді. Сонымен қатар, SONA.KZ парақшасының иесі анықталған соң, істі тергеуді ауыстыру туралы арыз түсірдік», – деді адвокат Карина Көшербаева.
Екінші адвокат Саида Тәуекелова «куәгер» статусына ие екі қыздың жайы туралы жеткізді. Ол қыздар аталған қылмысқа тікелей қатысы бар деп санайтынын, олардың әрекетіне қылмыстық-процесуалдық баға берілуге тиіс екенін мәлім етті.
«Біз 30 қазан күні Алматы облысы прокуратурасына тергеу әрекетіне тексеру жүргізу туралы шағым түсірдік. Біз екі қыздың әрекетінде ҚР ҚК 434-бабы (Қылмыс туралы хабарламау) бойынша қылмыс құрам бар деп санаймыз. Заңға сай, бұл ауыр қылмыс болып саналады. Біз олардың әрекетін аталған қылмыстық іске ауыстырып саралауды талап етеміз», – дейді адвокат Саида Тәуекелова.
Үшінші адвокат Марал Жайлаубаева марқұм Шерхаттың ағасы Нұрқанатқа трагедия түні жасалған шабуылды тергеу барысын айтып берді. Сол түні Нұрқанаттың ұялы телефоны мен әмиянын ұрлап кеткен. Тонауға байланысты 188-бап яғни ұрлық бойынша іс қозғалыпты.
«Нұрғанат Ғайыпбаевқа 3-4 рет жамбасы мен төсіне пышақ сұққан. Бұндай әрекет адамды өлтіруге тікелей бағытталған әрекет. Сондықтан біз Адамды өлтіруге оқталу бабы бойынша қылмыстық іс қозғауды сұрап өтініш хат түсірдік. Қазіргі таңда ол қарастырылып жатыр.
Іс бойынша жәбірленуші мен күдіктілерді ортада бетпе-бет жүздестіргіздік. Қазір тағайындалған сараптамалардың қорытындыларымен танысып жатырмыз», – деді адвокат Марал Жайлаубаева.