RUS
SMARTNEWS.KZ басылымының хабарлауынша, Қазақстанның бірінші ракеткасы Елена Рыбакина ұлттық құрама сапында халықаралық турнирлерде ойнамауына байланысты жанкүйерлер тарапынан айтылған сынға жауап берді.
Елена Рыбакина Билли Джин Кинг кубогының плей-офф кезеңі қарсаңында өткен баспасөз мәслихатында өзіне тағылып жүрген сыни әңгімелер туралы айтты.
"Шынын айтқанда, айтылып жатқан әңгіме көп. Бірақ маған қолдау танытып жүрген жандар да бар. Өкінішке қарай, денсаулығым сыр бергенде, мен біраз нәрседен бас тартуға мәжбүр боламын. Ал қазіргі уақытта өзімді жайсыз сезініп тұрғаным жоқ, бірақ керемет формадамын деп те айта алмаймын. Дегенмен 100 пайыз барымызды салсақ, әрі қарай өтуге толық мүмкіндігіміз бар", - деді Елена Рыбакина.
Елена Рыбакина Билли Джин Кинг кубогының плей-офф кезеңінде Оңтүстік Кореяға қарсы екі матчқа қатысады. Алғашқы ойын 16 қарашада Сео Хен Пакқа қарсы өтеді, ал екінші кездесуде 17 қарашада Да Ен Бакпен күш сынасады. Барлық матчтар Астанадағы Beeline Arena кешенінде өтеді.
Айта кетейік, соңғы бір жылдан астам уақыт ішінде Елена Рыбакина денсаулық жағдайына байланысты ұлттық құрама сапындағы екі кездесуін және Олимпиада ойындарын жіберіп алған болатын. Сондай-ақ Елена Рыбакинаның биылғы маусымда қанша қаражат тапқанын жазған едік.