RUS
SMARTNEWS.KZ басылымының хабарлауынша, елордада жеке тұрғын үйден өрт шығып, төрт бала мерт болды. Тілсіз жау сөндірілді. Бұл туралы қалалық Төтенше жағдайлар департаментінің баспасөз қызметі жазды.
«Бүгін таңертең Астанада екі қабатты жеке тұрғын үйде шатыр жартылай құлап, өрт болды. Құтқарушылар хабарлама келіп түскеннен кейін өрт орнына 6 минутта жетті. Өрт алдын ала 500 шаршы метр алаңда оқшауланып, толығымен сөндірілді. Өрт салдарынан 2011, 2015, 2021 және 2022 жылы туған төрт бала қаза тапты», - делінген хабарламада.
Қазір өрттің себебі анықталуда. Сот-медициналық сараптама тағайындалды.
«Оқиға орнында өрт зерттеу зертханасы жұмыс істеуде, қаза тапқандардың жақындарына Апаттар медицинасы орталығының және Астана қаласы ТЖД психологтары көмек көрсетуде», - дейді төтенше жағдайлар департаментінен.
Әкімдік өрттен зардап шеккен отбасыларға көмек көрсетілетінін айтты.
«Шатыры жартылай опырылып, өрт болған жеке екі қабатты үйде екі отбасы тұрған. Астана әкімдігі оларға қажетті көмек көрсетеді. Балалары құрбан болған және зардап шеккен отбасыға психологиялық көмек беріледі. Сонымен қатар материалдық, тұрғын үй және басқа да қажетті көмек көрсетіледі. Туыстарына қайғыра көңіл айтамыз», - делінген әкімдік таратқан хабарламада.
Жеке тұрғын үйде тұрып жатқан екінші отбасы уақытша баспанаға көшірілді.
«Әкімдік қызметкерлері отбасыларымен тұрақты байланыста, барлық қажетті көмек көрсетіледі», - деп толықтырды әкімдіктен.