RUS
Белгілі болғандай, Ұлттық қауіпсіздік комитеті 16 қарашада Бас прокуратурамен бірлесіп, Анталия қаласынан Алматыға халықаралық террористік ұйымның әрекетіне қатысы бар деген күдікпен ҚР азаматын жеткізген. Тергеу материалына сәйкес, ол ертеректе Сирияға кетіп, қарулы топтардың біріне қосылған. Содан кейін Түркияға жетіп, сол жерде полиция органдарының қолына түскен.
Оның өз еркімен Қазақстанға қайтып, заңмен қарастырылған қылмыстық жауапкершілікті тартуға дайын екені анықталып отыр. ҰҚК Қылмыстық кодекстің 257-бабы 2-бөлігі бойынша сотқа дейінгі тергеп-тексеруді жүргізіп жатқанын атап өткен жөн. Ол сот санкциясымен қамауға алынды.
Естеріңізге салсақ, Сириядағы соғыс аймағынан отандастарымызды елге қайтаруға бағытталған «Жусан операциясы» сәтті жүзеге асқаны белгілі. Төрт кезеңге бөлінген операция барысында Қазақстанға 595 азамат елге қайтарылды. Оның ішінде 406 бала, 156 әйел және 33 ер азамат бар.
Олардың басым бөлігі – 2012 және 2015 жылдар аралығында Астана, Алматы қалалары, Атырау, Батыс Қазақстан, Қарағанды және Маңғыстау облыстарынан кеткендер.