RUS
SMARTNEWS.KZ басылымының хабарлауынша, 55 жастағы мүгедек есебінде тұрған әйелді шарасыздығын пайдаланып оны секс-құлдыққа салған. Күдіктілер – жұмысшы әйел мен оның қызы боп шықты. Бұл туралы LIDER.KZ іздеу-құтқару еріктілер жасағының Астанадағы жетекшісі Айзада Жүсіпова Kazinform агенттігіне айтып берген.
«Екі жыл бұрын мынандай жағдай болды: мүгедектер есебінде тұрған 55 жастағы әйел (мылқау) Шұбар шағын ауданындағы «Забота» пансионатында күні-түні жұмысқа жегілген. Онда мүмкіндігі шектеулі, өздігінен жүріп-тұра алмайтын адамдар да мекен етеді, солардың дәретін тазалатқан.
Сондай-ақ бұл әйелдің мүгедек екенін, мүлде сөйлей алмайтынын пайдаланып жыныстық құлдыққа да салған. Біз ол әйелді тауып алып, полицияға тапсырдық. Арада екі ай өткен соң прокуратура хабарласып, ол әйелдің Қостанайдан Астанаға жасырын әкелінгенін, құжаттары қолдан жасалғанын мәлімдеді», - деді Айзада Жүсіпова.
Іздеу-құтқару жасағы жетекшісінің айтуынша, мүгедек жанды құлдыққа салғандар — әйел адам мен оның қызы. Олар сол «Забота» пансионатында жұмыс істеген.
Айзада Жүсіпова мұндай жағдайда еріктілер ұйымы тек жоғалған адамды тауып, құқық қорғау органдарына табыстайтынын, әрі қарайғы іс олардың құзіретіне жатпайтынын атап өтті.