RUS
Мамандар өлекседен сынама алып, нәтижесінде Сібір жарасы анықталғанын растап отыр. Мал базары карантинге жабылған. Қазір ондағы адамдар бақылауға алынып, мал соятын цехтар мен базарлар түгел тексеріліп жатыр.
«Ірі қаралар Батыс Қазақстан облысы Жанқала ауданы Жаңақазан ауылынан келген. Оның ішінен бір бас ауырып өлді. Сібір жарасы анықталғаны рас. Қорытындысы келді. Астанаға ғылыми зерттеу орталығына қарашаның 16-сы күні жіберілген. «Асыл агро» базары жабылды», – деді АШМ Ветеринарияны бақылау және қадағалау комитетінің Атырау облысы инспекциясы басшысының міндетін атқарушы Нұркен Баяров.
Санитарлық дәрігерлер мен ветеринарлар қаладағы барлық мал базарын бақылауға алды. Малдарға екпе салынып қана қоймай, онымен байланыста болған адамдар да бақылауға алынды. Өйткені мамандардың сөзінше ауру малдан адамға жұғады.
«Ауру мал анықталған жерге барып, мал күтіміне араласқан, малды әкелген, қарым-қатынаста болған адамның барлығы анықталып, мәліметтер денсаулық сақтау ұйымдарына берілді. 14 күнге бақылауға алынды. Жалпы бұл инфекция адамнан адамға жұқпайды. Малдан адамға жұғады, – дейді Атырау облысы санитария-эпидемиологияны бақылау департаменті басшысының орынбасары Алтынгүл Аймұратова.