RUS
SMARTNEWS.KZ басылымының хабарлауынша, 21 қарашада «Stranger» туры аясында Прагада өткен жеке концертінің алдында Димаш Құдайберген шоуының медиа серіктесі Чехияның ÓČKO TV телеарнасының студиясына шақырылған.
Эфирді жазуды бастамас бұрын Димаш жанкүйерлерімен телеарна студиясының жанында кездесті. Dears сүйікті әртісімен амандасу үшін алдын-ала жиналған. Димаш чех, қазақ, орыс, ағылшын, испан, қытай және басқа да ұлт өкілдерінен жиналған жанкүйерлерімен әңгімелесіп үлгерген.
Жанкүйерлерінің бірі оған елінің туына қолтаңба жазып беруін өтінген. Әнші бас тартып, не үшін қол қоймағанын түсіндірді.
«Бұл – ту. Мен туға қол қоя алмаймын. Қазақстанның туы немесе басқа елдің туы болсын. Мен кіммін сонша? Мен туға деген құрметім үшін қол қоя алмаймын. Кешірім өтінем», – деді әнші жанкүйерлерінің ортасында.
Сондай-ақ эстрада жұлдызы жанкүйерлеріне алғыс айтып, концертіне шақырды.
«Маған деген сүйіспеншіліктеріңіз бен қолдауларыңыз үшін алғысым шексіз. Менің өнерімнің ары қарай шарықтауының негізгі себебі сіздердің маған деген махаббаттарыңыз.
Сіздердің шынайы қолдауларыңыздың арқасында сіздерге деген махаббатымның белгісі ретінде ертең мен өнерімді жан-жақты танытуға дайынмын. Алла бәріңізге разы болсын. Осындай мүмкіндіктерді тудырып жатқан Аллама сансыз шүкір айтамын!
Сондай-ақ, сіздердің арқаларыңызда менің танымалдылығым бұрынғыдан да арта түскендей болды. Сіздерге көп рақмет! Ертең концертте кездескенше», – деп жүрекжарды тілегін білдірді әнші.