RUS
Депутаттық сауалда Түркістан облысындағы мақта өңдейтін зауыттардың электр қуатын көтерме бағамен тұтынғысы келетіні айтылған-ды.
Белгілі болғандай, мақта зауыттары 2024 жылдың басынан бері 1 КВт электр қуатыүшін 37 теңге төлеп жүр. Ал көтерме бағаны пайдалану үшін бір тәулікте орташа тұтыну көрсеткіші кемінде 1 МВт болу керек. Мақта өңдейтін кәсіпорындардың тәуліктік қуаты бұған жетпейтіндіктен, жеңілдіктен қағылып отыр. Сол олқылықты жою үшін депутаттар шекті норманы 1 МВт емес, 0,5 МВт-қа дейін төмендетуді ұсынған еді.
Премьер-министрдің орынбасары Серік Жұманғариннің айтуынша, шағын тұтынушыларды көтерме нарыққа кіргізсе, қосымша шығындар көбеюі мүмкін. Нақты айтқанда, жүйеде көрсетілетін қызметтердің ақысын, электр қуатымен қамтамасыз ету қызметі сатып алу және теңгерімдеуші нарықтағы теңгерімсіздіктерді сатып алу-сату шығындарын төлеуге міндетті болады.
«Электр энергиясының көтерме сауда нарығына қол жеткізу үшін кемінде 1 МВт орташа тәуліктік тұтынудың болуы жөніндегі талап энергия жүйесінің тұрақты және тиімді жұмысын қамтамасыз етуге, әкімшілік шығындарды азайтуға және электр энергиясының көтерме сауда нарығының теңгерімді жұмыс істеуі үшін жағдай жасауға бағытталған», — деп жазады Серік Жұманғарин.