RUS
SMARTNEWS.KZ басылымының хабарлауынша, Жігіттер квартетінің әншісі Бағлан Әбдірайымов Тұңғышбай Жаманқұловтың басына ауыр жағдай түскен кезді еске алып, оған қалай қолдау білдіргенін айтты. Өнер иесі аңыз актерді қолдап шыққаны үшін бірқатар адамнан сөз естігенін жасырмады.
Бағлан Әбдірайымов бұл оқиға туралы Instagram-дағы парақшасында айтты. Сөзінше, Жаманқұлов туралы жазба жариялаған соң оған біраз адам хабарласып, жазбаны алып тастауын айтқан.
"Тұңғышбай ағамыздың басында қиындық болған кезде шәкірттері, әріптестері, жалпы танымал адамдар ешқандай қолдау білдірген жоқ. Мен үйде жатып, Мұхтар Шахановтың бір өлеңін оқып қалдым. Бір қатарын алып, Instagram-дағы парақшама жүктеп қойдым. Астына "Түйені түгімен жұтып жатқан кісілер бар. Біз үшін хан бейнесінде қалыптасып қалған осындай тұлғаларымыз басына іс түсіп жатқан кезде қолдау бермей жатырмыз" деп жаздым. Қаражат жымқырды ма, жоқ па?! Оған менің қатысым жоқ. Бірақ егер қаржылай қолдау керек болса, осындай тұлғаларымыздың сөзін сөйлеп, ел-жұрт болып жинап берейік деп айттым. Бұл жазбамнан кейін бірнеше қоңыраулар түсті. Бәрі жазбамды өшіріп тастауды ұсынды. Бірақ мен өшірмедім", - деді әнші.
Мәселе шешілген соң Тұңғышбай Жаманқұлов өзіне қолдау білдірген өнердегі інісін бірден үйіне шақырып, алғысын айтқан.
"Тұңғышбай ағамыз ар жақта отырғанда сол жазбамды оқыған екен. Аман-есен шыққаннан кейін мені іздеді. Шәкірттері маған қоңырау шалды.Сол күні үйіне барып, Тұңғышбай ағаның мақтауын естіп қайттым. "Сенің туған анаңнан, тәрбие берген әкеңнен айналайын" деді. Алғысын айтып, кітаптарын сыйлады. Төріне отырғызып, арқамнан қағып ризашылығын білдірген. Кейін мен кино түсіретін кезде ағам еш ойланбастан менің фильміме түсуге рұқсатын берді. Негізі өзі киммерциялық киноларға көп түсе бермейді", - деді Әбдірайымов.