RUS
Қазақстанның, Кеңес Одағының Халық әртісі, Халық Қаһарманы, ҚР Мемлекеттік сыйлығының иегері, әйгілі композитор, дирижер, күйші Нұрғиса Тілендиев 100 жылдығына орай Роза Бағланова атындағы «Қазақконцерт» мемлекеттік концерт ұйымының үлкен залында «Отырар сазы шақырады!» концерті өтті.
Сахна төрінде Алматы қаласынан «Отырар сазы» Нұрғиса Тілендиев атындағы академиялық фольклорлық-этнографиялық оркестрі және Астана қаласынан Еркеғали Рахмадиев атындағы мемлекеттік академиялық филармониясының симфониялық оркестрі өнер көрсетіп, көпшіліктің ыстық ықыласына бөленді.
Елорда тұрғындары мен қонақтары екі оркестрдің және Е. Рахмадиев атындағы мемлекеттік академиялық филармониясының Камералық хорының орындауында Нұрғиса Тілендиевтің қазақ музыкасының алтын қорына енген шығармаларын тыңдады. Сондай-ақ, көрермендерге ерекше шығармашылық эксперимент ұсынылды: көне қазақ халық аспаптарының үнімен қатар, «Vivo per lei», «The Prayer», «Melodramma», «Remember», «She» және «Шиндлер тізімі» фильмінен композициялар орындалды.
Бұдан бөлек, ҚР еңбек сіңірген қайраткерлері Светлана Айтбаева мен Азамат Жылтыркөзов, халықаралық және республикалық байқаулардың лауреаттары Нұрғалым Аманбай, Фархат Кубиев, Толғанай Пазылақын, Ербол Тәжібаев, сонымен қатар, дәстүрлі ән өнер иесі Өзгеріс Шерікбай, халықаралық байқаулардың лауреаты Фируза Рахметова көрермендерге өз өнерін паш етті.