RUS
Ол 2003 жылы 30 желтоқсанда Павлодар облысы Екібастұз қаласында дүниеге келген. 2010 жылы Баянауыл ауданы, Бірлік ауылындағы Жылбек Ағаділов атындағы мектептің табалдырығын аттап, өзін жауапты, ізденімпаз әрі тәртіпті оқушы ретінде көрсете білді. Бұл асыл қасиеттер оның болашағына жарқын жол ашты.
Амир мектепті бітірген соң 2021 жылы Қазақстан Республикасы Ұлттық ұланының академиясына оқуға түсті. Бұл шешімі оның елге деген сүйіспеншілігінің, ерік-жігерінің және Отан алдындағы борышын орындауға деген ниетінің дәлелі болды.
Амирдің академиядағы оқу жолы жоғары жетістіктерге толы. Ол 2021-2022, 2022-2023, 2023-2024 оқу жылдарында қатарынан үш жыл бойы «Үздік оқу рейтингі» атағына ие болды. Бұл марапат тек жоғары академиялық үлгерімді ғана емес, сондай-ақ оның тәртіпке деген беріктігі мен қажырлы еңбегін де айғақтайды. Сонымен қатар, оның есімі ҚР Ұлттық ұлан академиясы музейінің филиалына енгенін атап өткен жөн. Мұндай мәртебе екінің біріне бұйыра бермейді.
Амир тек оқуда ғана емес, қоғамдық өмірде де алдыңғы қатардан көрініп жүр. Ол әртүрлі мәдени, спорттық және ұйымдастырушылық іс-шараларға белсене қатысып, академияның беделін арттыруға өз үлесін қосты. Осылайша, замандастарына үлгі бола білді.
Амир Арманұлының өмірлік ұстанымы – «Ерлікке толы жол – Отанға қызмет ету». Бұл қағида оның әрбір қадамы мен жетістігінде айқын көрініс тапқан. Ол өз ерлігімен, адалдығымен және білімге деген құштарлығымен болашақта Қазақстанның қауіпсіздігін қамтамасыз ететін кәсіби офицер, халықтың тірегі болатынын дәлелдеп келеді.