Бокстан Азия чемпионаты: Ел қоржынына 3 алтын түсті

Ел намысын алғашқы болып Виктория Графеева қорғап, рингке шықты.

В.Графеева 60 келіге дейінгі салмақта қытайлық Цяньге Лимен қолғап түйістірді.Бірінші раундта Виктория соққыларын барынша дарыта білді. Төрешілер есебі 4:1 болды. Екінші кезеңде қарсыласын тықсыра түсті – 5:0. Қорытынды есеп те – 5:0. Осылайша, Виктория Графеева қазақстандықтардан алғашқы болып алтын алды. 

Кейін Аида Әбікеева 63 келіге дейінгі салмақта вьетнамдық Линх Ха Тхимен шеберлік байқасты. Бірінші кезеңде Аида ширақ қимылдап, алға ұмтылған қарсыласын соққымен күтіп алып отырды – 5:0. Екінші раундта да жекпе-жек барысы өзгере қойған жоқ – 4:1. Үшінші кезеңде вьетнамдық боксшы басым болғанымен, қорытынды нәтиже 5:0 болды. Осылайша, Аида Әбікеева Қазақстан қоржынына екінші алтынды түсірді.

Бұдан кейін шаршы алаңға Наталья Богданова шықты. Н.Богдановаға 70 келіге дейінгі салмақта шаршы алаңның иесі Байсон Маниконмен жұдырықтасуға тура келді.Бірінші раундта төрешілер түгелдей Натальяның басымдылығын тіркеді. Екіншісінде есеп 3:2 болды. Дегенмен үшінші кезеңде қайтадан 5:0-ге өзгерді. Қорытынды есеп – 5:0, Н.Богданованың пайдасында. Осылайша, Наталья Богданова Қазақстан құрамасына үшінші алтынды әперді.