Күміспен күптелген күн

Оразбек Асылқұлов 57 келіге дейінгі салмақта әлем және Азия чемпионы, Азия ойындарының жеңімпазы, аса тәжірибелі өзбекстандық Миразизбек Мирзахалиловпен шаршы алаңға шықты. Азулы қарсыласынан именбей айқасқан Оразбек бірінші раундта соққыларын дәл тигізе білді. Мұны төрешілер көрмей қалған жоқ – 5:0.  Екінші кезеңде өзбекстандық боксшы алғашқы раундтағы есепті қайталап, таразы басын теңестірді. Ал шешуші үшінші раунд 5:0 есебімен М.Мирзахалиловтың пайдасына шешілді. 

Бұған дейін әлем және Азия біріншілігінің күміс жүлдегері атанып үлгерген Дулат Бекбауов 67 келіге дейінгі салмақта өзбекстандық Мужибилло Турсуновпен шеберлік байқасты. Аса қызу өткен жекпе-жек барысында бірінші раундта төрешілер басымдықты М.Турсуновқа берді – 3:2. Екінші кезеңде дәл осындай есеппен Дулат алға шықты. Үш раундтан соң бейнежазбаны қайталап көрген төрешілер жеңісті өзбекстандық боксшыға беріп жіберді. 

Әлем біріншілігінде үш рет қола, Азияда күміс алған А.Жүсіпов 71 келіге дейінгі салмақта өзбекстандық Хавасбек Асадуллаевқа қарсы келді. Бірінші раундта бес төрешінің төртеуі Абылайхан басым деп көрсетті – 4:1. Алайда екінші және үшінші раундта таразы басы Х.Асадуллаевқа ауды. Қорытынды есеп – 4:1, өзбек спортшысының пайдасында.

Диас Молжігітов 75 келіге дейінгі салмақта өзбекстандық Жавохир Умматалиевпен күш сынасты. Бірінші кезеңде төрешілер басымдықты түгелдей өзбек боксшысына берді – 5:0. Екінші раундта есеп 4:1 болды. Үшінші кезеңде Диас барын салғанымен, ештеңе өзгере қойған жоқ. Қорытынды есеп 5:0 болып, Жеңіс Умматалиевтің еншісіне жазылды.

Бұған дейін Санжар Тәшкенбай да күміспен күптелген еді.