RUS
Жоғарғы соттың мәліметінше, Атырау қаласының тұрғыны, спорт шебері Туризм және спорт министрлігіне 2021 жылы дзюдодан Лиссабон қаласында (Португалия), 2023 жылы Астана қаласында өткен самбодан Азия және Океания чемпионатында, Оралда самбодан шеберлер арасында әлем чемпионатында, Әбу-Дабиде (БАӘ) дзюдодан әлем чемпионатында жүлделі орындарды жеңіп алғаны үшін көтермелеу төлемі туралы өтініш білдірген. Дзюдошы министрліктің бас тартуына спорт ардагерлеріне төлемді көздемейтін уәкілетті органның Ережелеріне сілтеме жасап, сотқа шағым түсірген.
Мамандандырылған ауданаралық әкімшілік соты аталған істі зерттей келе, мынадай жайтқа назар аударып отыр.
– Ережеге сәйкес, әрбір алған орыны үшін халықаралық жарыстардың әрбір чемпионы мен жүлдегеріне, жеке спорт түрлері бойынша ұлттық құрама мүшелеріне 100 пайыз ақшалай ынталандыру төленеді. Ал халықаралық жарыстардың жеңімпаздары – спорт ардагерлеріне көтермелеу төлеуге тікелей тыйымдар жоқ. Талап қоюшы Қазақстан Республикасының атынан басқа елдердің спортшыларымен бірге жарысқа қатысып, қатысушы-елдердің жалпы медальдық есебінде есепке алынған жүлделі орындарға ие болған. Мысалы, Оралда самбодан өткен әлем чемпионатына әлемнің 20-дан астам елінен 550-ден астам спортшы қатысқан. Министрлік сенім білдіру құқығын қорғау қағидатын (ҚР Әкімшілік рәсімдік-процестік кодексінің 13-бабы) бұзған. Бұл әкімшілік органның заңсыз әрекетінен әкімшілік рәсімге қатысушы үшін ауыр зардаптарға жол берілмейтінін көрсетеді, - деп хабарлады соттан.
Осыған байланысты спорт шеберінің талап қоюы қанағаттандырылған. Сот министрлікті әлем чемпионатында жүлде алғаны үшін ақшалай ынталандыру төлеуге міндеттеді.
Сот шешімі заңды күшіне енген жоқ.