RUS
SMARTNEWS.KZ басылымының хабарлауынша, 13 желтоқсанда Алматы облысының әкімшілік істер жөніндегі сот алқасы марқұм Шерзаттың әкесі Қаржаубай Нұрымовқа қатысты Еңбекшіқазақ аудандық сотының шешімін өзгеріссіз қалдырды. Олар адвокаттардың апелляциялық шағымын қанағаттандырмады. Бұл туралы Stan.kz жазды.
Қаржаубай Нұрымовтың адвокаттары сотқа шағым түсіріп, жеңілдететін факторларды ескеруді сұрады.
"Қаржаубай Нұрымов - кәмелетке толмаған төрт баланың әкесі. Ол үйде жоқ кезде балалары әке қамқорлығынсыз қалды. Ол отбасының жалғыз асыраушысы. Қарт ата-анасы, жұбайы, кәмелетке толмаған балалары үйінде қалды", – делінген адвокаттардың шағымында.
Осылайша олар алдыңғы сот шешімін бұзуды талап еткен. Алайда сот шешімді өзгеріссіз қалдырды.
Еске салсақ, бұған дейін Талғарда жаппай төбелес болып, салдарынан 16 жастағы Шерзат Полат көз жұмған еді. Жасөсіпірімнің өлімінен кейін Шерзат Полаттың үйін белгісіз біреулер өртеп кетті. 9 желтоқсан күні Талғардың шетінен Шерзаттың ағасы Нұрғанат Ғайыпбаевтың денесі табылды.
Осы жайттан соң 10 желтоқсанда Шерзаттың ашынған әкесі журналисттердің келуін талап етіп, қолына пышақ ұстап өзіне қол жұмсайтынын айтқаны үшін ұсталған еді. Қаржаубай Нұрымов “Бұзақылық” бабы бойынша сотталып, 15 тәулікке қамауға алынды.
Қаралы отбасының отағасын қамауға алу көпшіліктің наразылығын тудырды.