RUS
SMARTNEWS.KZ басылымының хабарлауынша, Башар Асад елден қашқаннан кейін алғашқы мәлімдемесін жасады. Аталған мәлімдеме экс-президент кеңсесінің Telegram-каналында жарияланды.
Мәлімдемеде Сирияның бұрынғы президенті Башар Асад 8 желтоқсанда таңертеңге дейін Дамаскіде болып Сириядан 8 желтоқсанда кешке кеткенін айтты.
«Мен Дамаскіде болдым. Өз міндеттерімді 2024 жылдың 8 желтоқсаны, жексенбі күні таңертеңге дейін орындадым», – деді Башар Асад мәлімдемеде.
Асадтың айтуынша, ол Латакияға «лаңкестік күштер Дамаскіге жеткен кезде» көшіп келген. Ол Латакияға «ресейлік одақтастармен жауынгерлік операцияларды бақылау әрі үйлестіру үшін» барғанын да жеткізді.
Асад базаға Латакияға келгенде, «біздің күштер барлық жауынгерлік позициялардан толығымен алынып тасталғаны және армияның соңғы позициялары құлағаны анық болды» және «жағдай нашарлай берді». Сол кезде Мәскеу тарапы Ресейге жедел эвакуация ұйымдастыруды ұсынғанын да Сирияның экс-президенті атап өтті. Ол «Дамаскі мен әскери позициялар құлап, мемлекеттік институттар сал болып қалған соң» елден кетуге мәжбүр болғанын айтты.
Осылайша, бұрынғы президент бұл оқиғалар кезінде «ешқашан отставкаға кету немесе саяси баспана іздеу, елден кету туралы ойлаған емеспін» деп қосты.
«Шындықтан алыс жалған ақпараттар террорларды Дамаскіге айдап әкелді. Президенттің мәлімдемесі ертерек жариялануы керек еді, бірақ сол кездегі жағдайлар, дәлірек айтқанда қауіпсіз байланыстың толық үзілуі осы мәлімдемені жариялаудың кешігуіне әкеп соқты», – деді Башар Асар неліктен ертерек мәлімдеме жасамай, үнсіз елден қашқанына себеп болған жайтты түсіндіре отырып.
Мәлімдеменің жарияланған орны ретінде Мәскеу мен 16 желтоқсан күні көрсетілген.
Bloomberg дереккөздеріне сүйенсек, Башар Асадтың елден қашуы ресейлік барлаушылардың көмегімен ұйымдастырған. Олар оны Ресейдің Сириядағы Латакия провинциясында орналасқан «Хмеймим» әуе базасы арқылы алып кеткен. Асад кетіп бара жатқанда, ұшақтың транспондері бақыланбау үшін өшірілген көрінеді. Сонымен қатар, кетер алдында Ресей Сирияның экс-Президентін Қарулы көтерілісшілерге қарсы күресте жеңілетініне сендірген.
Сирияның бұрынғы президенті Башар Асадтың Мәскеуге келіп, Ресей оған баспана бергені туралы хабар 8 желтоқсан күні кешке ТАСС пен РИА Новости басылымдарында хабарланған еді. Кейінірек Ресей СІМ Асадтың «Қарулы қақтығыстардың қатысушылармен» келіссөздер жүргізуге тырысқанын, артынша президенттіктен кету туралы шешім қабылдағанын растаған еді.