RUS
SMARTNEWS.KZ басылымының хабарлауынша, Кереку өңірінде онкологиялық ауруларға 13 778 адам шалдыққан. Ал Қазақстан бойынша қатерлі ісіктерден болатын өлім-жітім рейтингінде өңір 3-орында тұр. Алдыңғы орындарда Солтүстік және Шығыс Қазақстан облыстары тұрған көрінеді. Бұл туралы Kazinform жазды.
Павлодар облысында жыл басынан қатерлі ісіктің 2 мыңнан астам жағдайы тіркеліп отыр. Қатерлі ісіктермен сырқаттанушылық рейтингінде облыс республикада 4-ші орынға шығып, жыл басынан 678 адам обырдан көз жұмған.
Облыста сүт безі обыры, колоректальды обыр, өкпенің қатерлі ісігі, асқазанның қатерлі ісігі және жатыр мойны обыры жиі тіркеледі. Былтыр аталған онкологиялық аурулардан аймақта 746 адам қайтыс болған. Облыс қатерлі ісікке шалдыққандардың саны бойынша республикада алдыңғы қатардан түспей тұр.
— Жылдың алғашқы 11 айында Павлодар облысында қатерлі ісіктердің 2200 жаңа жағдайы анықталды. Өткен жылдың сәйкес кезеңімен салыстырғанда әдеуір төмен. Дейтұрғанмен науқастардың жалпы саны азайған жоқ. 123 316 адам скринингтен өтіп, оның 137-сінде обыр анықталды. Сүт безі обырына — 98, жатыр мойны қатерлі ісігіне жаңадан 18 әйелдің шалдыққаны белгілі болды. Ал колоректальді қатерлі ісік скринингі бойынша 53 332 скринингтік зерттеулер жүргізіліп, 21 қатерлі ісік анықталды.
Былтыр қатерлі ісіктен 746 адам, ал биыл 678 адам қайтыс болды. Өкінішке қарай, өлім-жітім рейтингінде 3-ші орында тұрмыз, — дейді облыстық онкологиялық диспансер директорының ұйымдастыру-әдістемелік жұмысы жөніндегі орынбасары Әсел Асқарова.