Қазақстанда кеме құрастырыла ма?

- Көлік дәліздердің дамуына Ақтау және Құрық теңіз порттарының инфрақұрылымы маңызды рөл атқарады. Бұл ретте, басымдылық контейнерлік тасымалдауға беріліп отыр. Алдағы 3 жылдың ішінде Ақтау портының контейнер өңдеу қабілетін 140 мыңнан 550 мың контейнерге дейін ұлғайту жоспарланған. Ол үшін қытайлық «Ляньюньган порт» компаниясымен бірге контейнерлік хабтың құрылысы басталды. Оған қоса, германиялық «Ренус», америкалық Wandernet және франциялық CMA CGM сияқты компаниялармен қосымша 300 мың контейнерлік терминал ұйымдастыру пысықталып жатыр, - деді М. Қарабаев.

Министр Құрық портында көпфункционалды «Саржа» терминалының құрылысы жүріп жатқанын еске салды.

- Оның ішінде ерекше тоқталатын мәселе, Маңғыстау облысында өндірілу жоспарланған «жасыл сутегіні» тасымалдауға арналған тиісті терминалдың жобаланып жатқанын атап өткен жөн, - деді ведомство басшысы.

Оның сөзіне қарағанда, келесі негізгі мәселелердің бірі – отандық флоттың жетіспеушілігі. Бүгінде «Құрық – Алят» қарым-қатынасында тек әзербайжандық паромдар жұмыс істеп тұр. Сондықтан қазірдің өзінде елімізге ең кемінде 7 кеме қажет. Оның өндірісін қалыптастыру үшін түркиялық YDA және ASFAT компаниялары Құрық портының жанында арнайы зауыт құрылысын жоспарлап отыр.

- Қазақстандық дәліздерге жүк ағындарын тарту үшін ішкі терминалдармен қатар, шет елдердің жүк жинақталатын аумақтарында сыртқы терминалдар да қалыптастырылып жатыр. Қазір Ляньюньган портында және Сиань қаласының құрғақ портында Қазақстан-Қытай терминалдары бар, сондай-ақ Грузияның Поти портында қазақстандық кәсіпкердің терминалы жұмыс істеп тұр. Өңдеу қабілеті жылына 500 мың контейнер. Қосымша Алят портында, Мәскеу маңындағы Селятино қалашығында, Беларуссиядағы Свислочь станциясында және Ташкенттегі терминалдардың құрылысы пысықталып жатыр. Құрылыс жұмыстары келесі жылы басталады. Жалпы қуаттылығы жылына 1 млн 200 мың контейнерді құрайды. Одан бөлек алдағы уақытта Румынияның Констанца, Мажарстанның Будапешт және Қытайдың Үрімші қалаларында бірлескен терминалдарды ұйымдастыру қарастырылып отыр. Нәтижесінде, сыртқы терминалдардың қуаттылығы 5 есеге өседі. Бұл басты жүк қалыптастырушы елдерден жүктерді қазақстандық дәліздерге тартуға мүмкіндік береді, - деп түсіндірді Марат Қарабаев.