RUS
Олар жас отбасылар деп бөлектеуге болмас. Қырыққа келсе де күйбең тіршілікпен басы қатып жүргендер аз емес. Сондықтан да соғымның әңгімесі біреуге тәуір, біреуге ауыр тиетіні рас.
Базардағы сатушылар да сұраныстың азайғанын жасырмайды. Көбі тапсырыспен алдырады дегеннің өзінде халықтың қалтасы жұқа екенін жасырмайды.
«Бір отбасыға 1,5 жасар тай алуға болады. 170-180 кг дейін береді. Үлкендері 230-250 кг дейін тартады. Бағалары шамамен 380-400 мың теңге аралағында. Үлкендері 600-650 мыңға дейін барады. Өзгеріс жоқ. Былтырғымен бірдей. Былтыр да 2600 теңге болған. Бізге еттің бірден өтіп кеткені жақсы ғой. Алайда халықтың қалтасы жұқа екені байқалады. Молынан алғысы келсе де, аздап-аздап сатып алуға мәжбүр», - дейді Елубай есімді сатушы.
Нұрболат Әбдіразақов есімді желі қолданушысы халықтың жартысының соғым алуға жағдайы жоқ екенін айтады.
«Халықтың 49 пайызының соғым алуға шамасы жоқ. Бір кг жылқы еті 2200-2500 теңге. Бір жілік 25-30 мың теңге», - дейді ол.
Астана тұрғындарын көшеде тоқтатып, әңгімеге тартқанымызда көбінің соғым алуға шамасы жоқ екенін жасырмады. Күнделікті тамаққа тауық етін пайдаланатындарын айтып қалды. «Азық-түлік бағасы аспандап барады, соғымсыз-ақ қыстан аман шығармыз, ипотека, несие төлеу керек, мойнымызда», - деп жатты жұмыстарына асыққан жұртшылық...