«Грозныйға анасына ұшып бара жатқан»: ұшақ апатынан қаза тапқан жасөспірімнің денесі жер қойнына тапсырылды

SMARTNEWS.KZ басылымының хабарлауынша, "Гянджлик" клубының 13 жастағы футболшысы Мұхаммедәли Еганов Бакудегі Сурахани зиратына жерленді. Бұл туралы Әзербайжандық Report басылымы жазды.

Жасөспіріммен қоштасу рәсіміне ағайын-туысы мен қала тұрғындары жиналған.

Басылым мәліметінше, марқұмның достарының бірі Хусейн Гулиев журналистерге Мұхаммедалидің жақсы дос болғанын және спортта зор үміт күттіргенін айтқан.

"Ол жақсы дос болды. Біз бір мектепте оқыдық. Ол кетер алдында барлық досымен және мұғалімдерімен қоштасып үлгерді", - деп еске алады Хусейн.

Марқұмның нағашысы Зара Еганованың жергілікті Media.az басылымына хабарлауынша, бала жаңажылдық демалысты анасымен бірге өткізу үшін Грозныйға ұшып бара жатқан.

"Жиеніммен сөйлеспегеніме көп болды. Бірдеңе деу өте ауыр. Ол мерекені анасымен бірге қарсы алу үшін Грозныйға ұшып бара жатқан. Өте жақсы бала еді", - дейді марқұмның туысы.

Еске салсақ, Мұхаммедали қайтыс болғаннан кейін сыныптастары әлеуметтік желі арқылы оның анасына бару үшін Грозныйға ұшып кеткенін айтқан еді. Кейін баланың Бакудің Хатай ауданында тұратыны және сол жерде орта мектепте оқығаны белгілі болды.