RUS
SMARTNEWS.KZ басылымының хабарлауынша, жылдың қызықты оқиғаларын қорытындылайтын «Қызық премия-2024» тележобасында қонақ болған Париж олимпиадасының чемпионы Елдос Сметов өзіне берілген жүлдені білім саласының үздігіне табыстауды шешті. Оған жоба авторлары «Жылдың үздік спортшысы» премиясын берген.
Сахнаға құрметпен шақырған соң, қолына микрофон алған спортшы өз марапатын алудан бас тартатынын айтып елді таңғалдырды. Ол білім мен ғылым саласындағы жандар елеусіз қалып жатқанын ескертіп, өз премиясын химия пәнінен 2023 жылғы халықаралық олимпиада чемпионы Санжар Бейсенәліге табыстап жіберді.
«Мен өзім «Жыл спортшысы» номинациясын осыған дейін 3-4 рет алдым. Қазір Халықаралық дзюдо федерациясы 2024 жылғы спорт маусымын қорытындылайтын «IJF Judo Awards 2024» жүлдесінің үміткерлер тізімінің қатарына ендім. Әлемде үздік болуыма қолдау көрсетіңіздер.
Енді осы «Қызық премия» берген марапатты жылдың бастамасы болсын деп, химия пәнінен олимпиада чемпионы Санжар Бейсенәліге табыстағым келеді», - деді Елдос Сметов.
Еске салсақ, 2023 жылы Қазақстан оқушылары IChO химиядан өткен халықаралық 55-олимпиададан бір алтын, екі күміс және бір қола медаль жеңіп алды. Алтын медаль сол кезде «Назарбаев зияткерлік мектебінде» 12-сыныпта оқыған Санжар Бейсенәліге бұйырған. Бұл жарыс әлемдегі ең беделді 7 олимпиаданың қатарына кіреді.
Елдос Сметов болса, Париж олимпиадасында жалғыз алтын алған дзюдошы болды. Ол үш бірдей олимпиада жүлдесін алған Қазақстанның жалғыз спортшысы.