RUS
SMARTNEWS.KZ басылымының хабарлауынша, Астана қаласының қылмыстық істер жөніндегі ауданаралық соты бірнеше рет алаяқтық әрекеттер жасады (ҚК190-бабы 3-бөлігінің 4) тармағы) деп айыпталған А.-ға қатысты істі қарады.
Айыптаудың мәні
А. Дубай шоколадын сатамын деп сылтауратып, бірнеше рет жәбірленушілердің ақшаларын иемденіп отырған. Ол 10 жәбірленушінің 301 020 теңге ақша қаражатын жымқырған.
Сотталушының кінәсі жәбірленушілердің айғақтары, банктік аударымдары және қылмыстық іс материалдары арқылы дәлелденген.
Тараптардың ұстанымы
Прокурор 3 жыл 6 ай бас бостандығын шектеу түріндегі жаза тағайындауды сұрады.
Қорғаушы тарап бас бостандығынан айырмайтын жаза тағайындауды сұрады.
Жаза
ҚК-нің 190-бабы 3-бөлігі 4-тармағының санкциясы мүлкi тәркiленіп, белгiлi бiр лауазымдарды атқару немесе белгiлi бiр қызметпен айналысу құқығынан 6 жылға дейiнгi мерзiмге айыра отырып, 3 жылдан 7 жылға дейінгі мерзiмге бас бостандығын шектеуді не айыруды көздейді.
Жасаған ісіне өкіну және зиянды өтеуі жауапкершілік пен жазаны жеңілдететін мән-жайлар деп танылды.
Жазаны ауырлататын жағдайлар анықталған жоқ.
Сот үкімімен А. ҚК-нің 190-бабы 3-бөлігінің 4) тармағымен кінәлі деп танылып, 3 жылға бас бостандығынан шектелді.
Үкім заңды күшіне енген жоқ.