RUS
SMARTNEWS.KZ басылымының хабарлауынша, 8 қаңтар күні таңертең Оралдағы «Алый Парус» ЖШС маршруттық автобустарының жүргізушілері кәсіпорындағы мәселелерге байланысты желіге шықпаған. Олар ереуілге басшылықтан бірқатар мәселені шешуді талап етіп шыққан көрінеді. Аталған жағдайдың мәнжайын Мой город порталы жазды.
Қызметкерлердің айтуынша, олар ауруханаларға бара алмайды. Өйткені жарты жыл бойы медициналық сақтандыру бойынша аударымдар жасалмаған. Сондай-ақ олардың зейнетақы қорына аударымдар болмаған соң тіпті несие де ала алмай отыр.
Осылайша бүгін № 3, № 35, № 14, № 3К, № 51 маршруттық автобус жүргізушілері жұмысқа шықпаған. Мұндай әрекетімен жүргізушілер естір құлақ болса, басшылық мәселелерге назар аударса екен дейді. Бұған дейін де ұзақ уақыт бойы басшылар аталған проблемаларды шешуге уәде бергенмен, бірақ бәрі сол күйі шешілмеген.
«Алты ай ішінде бізге әлеуметтік және медициналық аударымдар жасамаған. Жігіттер ауырып қалады, жедел жәрдем шақырады, бірақ оларды МӘМС-сыз қабылдамайды да, емдемейді де. Зейнетақы аударымдары да жасалмаған. Жалақыны төлегенмен, оны әбден кешіктіреді. Басқа компанияларда жалақыны 10 күніне дейін алады, ал біз 20-сынан кейін бір-ақ аламыз. Кейде бәрін бірден төлемейді, кейде 70 пайызын, кейде жартысын береді.
Бізге «Жағдайды түсініңдер», «Әкімдіктен ақша түспей жатыр» дейді. Ал алты ай өтті, оны қалай түсінуге болады? Барлығының несиелері, отбасы, қажеттіліктері бар ғой. Пәтерақыны төлеу керек, киіну, азық-түлік алу керек дегендей. Жаңа жылға кейбір компаниялар өз қызметкерлеріне сыйлықтар мен аванстар берген, ал бізге ол да жоқ", – деді «Алый парус» ЖШС механигі Нұржан Төлеуов.
Жүргізушілердің айтуынша, компаниядағы төлемнің тағы бір мәселесі – ақылы демалыстың да ақшасы да «көрінбейтін пұл» көрінеді.
«Өткен жылдың наурыз айында демалысқа шыққандар демалысының ақшасын әлі алған жоқ. Олар демалыс ақысы екі қызметкерге беріледі деп айтты. Міне, екеуіне берді, кейін бәрі сол жерде бітті. Бұған дейін бізде кездесулер өтті, бірақ бізге уәде бергенмен, бітірген түгі жоқ», – дейді № 3 маршруттық автобустың жүргізушісі Нұрбек Тәженов.
Мой город порталының мәліметінше, кәсіпорын басшысы түсініктеме беруден бас тартқан. Ереуіл орнында Орал әкімінің орынбасары Азамат Халелов келіп, жағдайды түсіндірген көрінеді.
«Автопарк шамамен жеті қалалық бағытқа қызмет көрсетеді. Барлық маршруттар әлеуметтік маңызы бар, қала маңына қызмет етеді: құс фабрикасы, Круглоозерное, Мичурино. Бұл бағыттарды мемлекет субсидиялайды. Біз проблемаларды шешеміз. Бәрі бір фактіге негізделеді – компания мемлекеттен алуға тиісті барлық субсидияларды алмайды.
Барлық алты тасымалдаушыға жылына 2-5 миллиард теңге төлейміз. «Алый парус» ЖШС субсидияларының үлесі-жылына 400 миллион теңге. Ай сайын 38-40 миллион теңге. Бүгінгі таңда мемлекет тиісті көлемнен субсидиялардың 70 пайызын қамтиды. Жыл сайын субсидия көлемін көтереді. Сондықтан бұл мәселе реттеледі деп ойлаймын», - деді Азамат Халелов.
Сондай-ақ, ол жүргізушінің жұмысқа шықпауы – айыппұл салуға негіз бола алады. Дегенмен мәселенің әлеуметтік сипатын ескере отырып, ереуілшілерге қатысты айыппұл салынбайтынын атап өтті.
«Қазір автобус жүргізушілері «Автобустарға мініп, желіге шығамыз» деп келісті. Ереуілге байланысты кейбір азаматтар жұмысқа келмеді немесе кешігіп қалды. Сондықтан біз қала басшылығынан кешірім сұраймыз. Компаниядан аударымдар бойынша берешек шамамен 60 миллион теңгені құрайды», - деп қорытындылады әкім орынбасары.