RUS
SMARTNEWS.KZ басылымының хабарлауынша, Ресейдің пропагандисі Тигран Кеосаян клиникалық өлімді бастан өткеріп, қазір ауыр жағдайда комада жатыр. Бұл туралы Кеосаянның әйелі, пропагандист-журналист Маргарита Симоньян телеграм-каналында жазды.
Baza телеграм-арнасы 59 жастағы Кеосаянның «жағдайы өте ауыр» көрінеді. Бұған дейін 2010 жылы ол екі рет өлім аузында болып, инфаркт алған еді.
Еске салайық, 2022 жылы мамырда Қазақстан Жеңіс күніне парад өткізуден бас тартқанда, Кеосаян Қазақстанға қарата «Украинаға қараңдар, дұрыстап ойланыңдар. Біздің жауапты адамдар Қазақстанмен қарым-қатынас деңгейін қайта қарауы керек» деген еді.
Кеосаянның сес көрсеткен сөзі Қазақстан қоғамында қарсылыққа ұшырады. Еліміздің Сыртқы істер министрлігі Кеосаянды «елге келуге тыйым салынғандардың» тізіміне қосты. Артынша Кеосаян министрліктің бұл әрекетін мазақ етіп, бұл тыйымға қарамастан «Қазақстанға кіріп аламын» деді.
Кеосаянның әйелі Маргарита Симоньян да қарап жатпады. Ол 2022 жылдың ақпанында қазақ дипломаттарының Украина аумағындағы «ДХР» және «ЛХР» сепаратистік құрылымдарының тәуелсіздігін мойындамайтыны туралы үндеуіне «рахметі жоқтар» деп жауап айтып, бұдан бөлек Қаңтар оқиғасы кезінде ҰҚШҚҰ Қазақстанға кіргенін еске салып, «Бұларды неге құтқардық?» деп дабыл қақты.
Биыл Ресей әскерінің Сириядан шығарылуына да қарсы шыққан ол, арандатушы сөздерін Қазақстанға бағыттамай отыра алмады. Украинадағыдай «Ресей Қазақстанға да әскер жіберсе бақытты боламын» деп үндеу тастады.
Мәжіліс депутаты Айдос Сарым оның бұл мәлімдемесіне пікір білдіре отырып, пропагандистің билікте шешім қабылдайтын адамдар қатарына жатпайтынын еске салды.